Хитойнинг Тяньцзинь шаҳрида юз берган портлаш қурбонлари хотираси учун фожиа юз берган жойда хотира ёдгорлиги ўрнатилади. Бу ҳақда, 12 август куни портлаш юз берган «Биньхай» портбўйи ҳудудий маъмуриятига асосланиб, «ТАСС» хабар бермоқда.
Портлаш натижасида камида 160 киши ҳалок бўлган бўлиб, уларнинг 96 нафари ўт ўчирувчилар, 11 нафари полициячилардир. 13 киши ҳали ҳам бедарак йўқолганлар рўйхатида турибди. Фожиа оқибатида 800 га яқин киши турли даражада тан жароҳати олди.
Ёдгорлик атрофида умумий майдони 24 гектарга тенг хиёбон ташкил этиш ҳақида қарор қабул қилинган. Бундан ташқари, шаҳар маъмурияти портлаш натижасида уйи вайрон бўлганларга 5 мингдан ортиқ янги хонадонларни тақдим этиш ниятида.
Портлаш «Жуйхай» логистика компаниясининг омборхоналарида юз берганди. Портлаш тўлқини 2 километр радиусдаги турар-жой биноларининг деразаларини синдириб юборди ва мингдан ортиқ автомобилларга зарар етказди.
Изоҳ (0)