Навоийдаги “Темирчи” олтин кони қарийб 68 млрд сўмга сотилди

4,1 миллиард сўм билан сотувга қўйилган “Темирчи” олтин кони аукционда 67 миллиард 780 миллион 777 минг сўмга сотилди.

Аукцион савдолари 18 август куни E-auksion платформасида 12 соатга яқин давом этган. Берилган 309 та таклифлар орасида бошланғич нархдан 16,5 баравар юқори таклиф билан “Zauris” МЧЖ ғолиб чиқди.

Маълумотларга кўра, асосий фаолият тури рангли металл рудаларини қазиб олиш бўлган ушбу корхона жорий йилнинг 4 июль куни Тошкент шаҳрида рўйхатга олинган. 10 миллион сўмлик устав капиталининг 100 фоиз улуши корхона раҳбари сифатида ҳам кўрсатилган Ф.Ф.га тегишли.

Ғолиб белгиланган жойлардан қимматбаҳо металларни олтин изловчилар усулида қазиб олиш ҳуқуқини қўлга киритади ва амалдаги қонунчиликка мувофиқ қидирув ишларини олиб боради.

Маълумот учун, “Темирчи” олтин кони Зафаробод қишлоғидан 26,7 км шимоли-ғарбда ва Навоий шаҳридан 35 км шимолда жойлашган. Унинг фойдали қазилма ресурслари ҳужжатларда 6 тонна дея кўрсатилган. Унинг майдони эса 249 гектарни ташкил этади.

Аввалроқ “Қумтор” конида 261 тонна олтин захираси борлиги тўғрисида хабар қилинганди. Конда аввалига олтин захираси тахминан 127 тонна эди, 2024 йил ва ундан олдин ўтказилган геология-қидирув ишлари натижасида 147,5 тонна олтин захирага қўшилди.