Ўзбекистон U-19 ёшлар терма жамоаси Япониядаги Balcom BMW халқаро турниридаги иштирокини ғалаба билан бошлади, деб хабар бермоқда Ўзбекистон футбол федерацияси матбуот хизмати.
Япониянинг Хиросима шаҳрида старт олган Balcom BMW Cup халқаро турниридаги илк учрашувда Жасур Абдураимов бош мураббийлигидаги Ўзбекистон ёшлар терма жамоаси Польша ёшлар терма жамоасига қарши майдонга тушди. Таъкидлаш жоиз, учрашув анча қизиқарли ва голларга бой тарзда кечди. Ўйиннинг асосий вақти 2:2 ҳисобидаги дуранг билан якунланди ва мусобақа регламентига кўра ғолиб номи ўйиндан кейинги пенальтилар сериясида аниқланди. Унда Ўзбекистон ёшлар терма жамоасига омад кулиб боқди ва ушбу серия 6:5 ҳисобида Ўзбекистон ёшлар терма жамоасининг ғалабаси билан якунланди.
Аввалроқ хабар берилганидек, ушбу мусобақада Ўзбекистон ва Польша ёшларидан ташқари Япония ҳамда Хиросима шаҳри терма жамоаси ёшлари ҳам иштирок этади.
Ўзбекистон ёшлар терма жамоаси Balcom BMW Cup турниридаги иккинчи ўйинини 11 август куни Япония ёшларига қарши ўтказади.
Изоҳ (0)