Малайзия Коррупцияга қарши кураш бошқармаси мамлакат бош вазири Нажиб Раззоқнинг банкдаги шахсий ҳисоб рақамига 700 миллион доллар ўтказилганини тасдиқлади. Шу билан бирга, бошқарма вакиллари «маблағлар, ҳукумат раҳбарининг сиёсий рақиблари таъкидлаганидек, 1MDB давлат инвестиция жамғармасидан эмас, ҳомийлардан келиб тушган», дея маълум қилди. Бу ҳақдаги барча маълумотлар бош прокуратура ихтиёрига юборилган.Бу ҳақда «ТАСС» хабар бермоқда.
Эслатиб ўтамиз, мазкур ҳолат юзасидан текширувлар Wall Street Journal нашрида бош вазир ҳисоб рақамига ўтказилган йирик миқдордаги пуллар тўғрисидаги мақолалардан сўнг бошланди. Муаллифлар маблағларни давлат жамғармаси билан боғлиқ компаниялар ўтказганини даъво қилган.
Нажиб Раззоқ, ўз навбатида, унга нисбатан илгари сурилган барча айбловларни рад этиб, ҳеч қачон жамғарма маблағларидан шахсий мақсадда фойдаланмаганини уқтирмоқда.
Изоҳ (0)