Чамадон ичига яширинган шимолий африкалик эркак Испаниянинг Африка қисмидан Европа томонига йўл олган паромда вафот этди. EFE агентлиги хабарига кўра, мазкур саёҳат беш соат давом этган.
Ичида одами бор чамадон марҳум муҳожирнинг акаси бошқарувидаги автомобилда бўлган. Паром Альмерия қирғоқларига етганида, ҳайдовчи маҳаллий маъмурият вакилларига 27 ёшли қариндошининг аҳволи яхши эмаслигини маълум қилган. The Local маълумотига кўра, эркакни жонлантиришга ҳаракат қилган қутқарувчилар унинг ўлимини қайд этган. Марҳумнинг акаси ҳибсга олинган.
2015 йилнинг майида ҳам шунга ўхшаш ҳодиса юз берган эди. Ўшанда испан чегарачилари рентген аппарати ёрдамида чамадон ичида 8 яшар бола борлигини аниқлаган. Бола Испанияга ота-онаси билан яна бирга бўлиш учун олиб кетилаётган эди. Июнда бола одамни чегарадан ноқонуний олиб ўтишга уринишда айбланган ота-онаси билан кўришган.
Маълумот учун, 2015 йил бошидан бери ўн минглаб муҳожирлар Ўртаер денгизини кесиб ўтиб, Европага кириб боришга ҳаракат қилди. Reuters маълумотларига кўра, ўтган давр мобайнида уларнинг икки мингга яқини ҳалок бўлган.
Изоҳ (0)