Украина президенти Пётр Порошенконинг маълум қилишича, президент бўлгунига қадар ўзига тегишли бўлган бизнес-мулкларни ҳозирги вақтда Ғарб инвестициявий компаниялари бошқармоқда. Бу ҳақда «Корреспондент.net» хабар бермоқда.
Унинг сўзларига кўра, у ўз бизнесидан «кўнгилли равишда узоқлашган». Айни вақтда, у ўз мулкларини айнан қайси компаниялар бошқараётганига аниқлик киритмади.
Порошенконинг қўшимча қилишича, унинг президентлик фаолияти мулкий манфаатлари билан боғлиқ эмас. Ўз навбатида, у «бадавлат одамлар сиёсат билан шуғулланиш имконига эгалигини нормал ҳолат» деб ҳисоблайди.
Июль ойида Порошенко, акциядорлар орасида унинг фамилияси бўлмаслиги учун, Roshen компаниясини ишончли бошқарув асосида Rothschild Investment’га топширишини маълум қилганди.
«Forbes Украина» нашри томонидан март ойида эълон қилинган Украинанинг энг бой одамлари рейтингида Порошенконинг бойлиги 750 миллион доллар деб баҳоланганди.
Изоҳ (0)