Яман президенти Абд Раббо Мансур Хади 1 август, шанба куни мамлакатда таниқли уч сиёсий арбоб — Ҳайдар Абу Бакр ал-Аттас, Аҳмад Убайд бин Дагр ва Абдул Азиз Аҳмад Жабарийни маслаҳатчи лавозимига тайинланганини эълон қилди. Бу ҳақда «Коммерсант.ru» хабар бермоқда.
Яман сиёсий саҳнаси фахрийларидан бири ҳисобланган Ҳайдар Абу Бакр ал-Аттас апрель ойида 76 ёшга тўлди. У 1990—1994 йилларда, Шимолий ва Жанубий Яман бирлашганидан сўнг вазирлар маҳкамасига раислик қилган вақтида айниқса катта муваффақиятларга эришган.
Аҳмад Убайд бин Дагр 2011 йилдан бери Муҳаммад Басиндва ҳукуматида Ахборот-коммуникация технологиялари вазирлигига раҳбарлик қилиб келаётганди, айни вақтда, у ҳукмрон Умуммиллий конгресс партияси етакчиларидан бири ҳам саналади.
Абдул Азиз Жабарий эса Адолат ва қурилиш партияси асосчисидир. Бундан ташқари, Жабарий 2015 йилнинг май ойида Саудия Арабистонида ташкил этилган Яман бўйича конференция ташкилотчиларидан бири эди.
Эслатиб ўтамиз, гуманитар ташкилотларнинг сўнгги ҳисоботларига кўра, қуролли низо домида қолган Яманда 6 миллиондан ортиқ аҳоли очлик ёқасида турибди.
Изоҳ (0)