Ҳурматга лойиқ саккиз таниқли шахс

Барча миллионерлар ва таниқли шахслар ҳам ўзининг бойлиги ёки юқори лавозимини кўз-кўз қилавермайди. Уларнинг шундай вакиллари борки, оддий одамлардек, камтарона ҳаёт кечиради. «Adme.ru» ана шундай саккиз нафар шахс ҳақидаги маълумотларни тақдим этди.

Швециянинг оддий маликаси

Бу Мадлен, Швеция маликаси. Ҳа, у ўз итининг ахлатини кўчада қолдирмайди.

Дунёдаги энг камбағал президент

2010 йил мартидан 2015 йил мартигача Уругвай давлатига раҳбарлик қилган Хосе Кордано Мухика «дунёдаги энг камбағал президент» номини бежизга олмаган. У 263 000 песо (9300 доллар) лик маошидан ўзига фақат 26 300 песо (930 доллар) қолдириб, қолганини хайрия қилган. Қишлоқдаги фермада яшайдиган Мухиканинг энг йирик хариди — Volkswagen «қўнғиз» автомобили бўлган. Унинг банкда ҳисоб рақами ҳам, қарзи ҳам йўқ.

Мухика шифохонада навбат кутмоқда

Лондон мэри

Лондон мэри Борис Жонсон галстук тақмай юришдан, спорт курткаси, велосипед шлемини кийишдан ёки рюкзак тақишдан уялмайди. У Буюк Британияда велосипедлар ҳаракатини ривожлантиришнинг энг йирик тарафдорларидан бири ҳисобланади.

Рейкьявик шаҳри мэри

Ҳозирда Исландия пойтахтига раҳбарлик қилувчи Йоне Гнарренинг олий маълумоти йўқ, комедия актёри ва такси ҳайдовчиси бўлган. 2010 йилда у ўз сиёсий партиясини тузиб, уни «Энг яхши партия» деб номлаган. Партияга асосан ижодкорлар, аввал сиёсат билан шуғулланмаган шахслар аъзо бўлган. Шаҳар аҳолиси сайловда айнан шу партиянинг етакчисига энг кўп овоз берган.

Нью-Йоркнинг собиқ мэри

Майкл Блумберг дунёнинг энг бой инсонлари рўйхатида 13-ўринда туришини пайқаш қийин. У метрога тушиб туради, офиси ҳам жуда оддий.

Хиппи-миллиардер Ричард Брэнсон

Virgin авиакомпанияси асосчиси Ричард Брэнсон кичик мусиқа дўконини 10 йил ичида дунёнинг барча қитъаларига тарқалган кўп тармоқли бизнесга айлантира олди. Бироқ у ноодатий ҳаракатларидан воз кечмагани учун «хиппи-миллиардер» номини олган. Унинг энг сўнгги ёрқин чиқиши — AirAsia авиакомпанияси стюардессаси либосини кийиб олиши бўлди.

Google афсонаси

Google компанияси асосчиларидан бири ва технологиялар бўйича президенти Сергей Брин АҚШнинг энг бой инсонларидан бири ҳисобланади, шунга қарамай камтарона ҳаёт кечиради. У ҳали ҳам уч хонали уйда яшайди, Mercedes’да эмас, балки экологик тоза гибрид двигателли Toyota Prius’да юради.

Миллиардсиз миллиардер

Чак Фини Duty Free Shoppers дўконлар тармоғи асосчиси бўлиб, унинг The Atlantic Philanthropies хайрия жамғармаси турли соҳалар учун 6,2 миллиард доллар ажратган. 2020 йилгача Фини ўзининг бутун бойлигини муҳтожларга сарфлаб тугатмоқчи.