Зимбабве аҳолиси ва халқаро ҳамжамият Хванге миллий боғида 13 ёшли Сесил лақабли шерни отиб ўлдирган миннесоталик тиш шифокори Уолтер Палмер учун муносиб жазо берилишини талаб қилаётган бир пайтда, машҳур шахслар ҳам бундан четда қолгани йўқ. Жумладан, таниқли актёр, Калифорниянинг собиқ губернатори Арнольд Шварценеггер ҳам ўз фикрини билдирди. Бу ҳақда «Segodnya.ru» хабар бермоқда.
«Жаноб Коинот» ва «Жаноб Олимпия» унвонларининг кўп карра соҳиби Instagram тармоғида ўзининг совринлар билан тушган суратини жойлаштириб, айнан уларни муносиб ўлжа дея ҳисоблашини маълум қилди.
Эслатиб ўтамиз, Зимбабве полицияси америкалик «овчи»ни жавобгарликка тортиш бўйича ҳужжатларни тайёрламоқда. Палмер оммавий намойишлар ўтказилаётган ва остонаси шер кўринишидаги юмшоқ ўйинчоқлар билан тўлиб кетган Миннесотадаги идорасини вақтинча ёпишга мажбур бўлди. У қўлга киритган ўлжа — Сесилнинг боши ва териси мусодара этилди.
Изоҳ (0)