Россияга қарши қаратилган санкциялар узоқ давом этмайди. Чеченистон раҳбари Рамзан Қодировнинг фикрича, Ғарб ўзининг иқтисодий хавфсизлиги йўлида бу санкцияларни бекор қилади, дея хабар бермоқда «ТАСС».
«Санкциялар узоқ давом этмайди, деб ўйлайман. Нима дейишларидан қатъий назар, Россиясиз Ғарбга қийин бўлади. Охир-оқибат, улар санкцияларни бекор қилиш керак, деган қарорга келади. Бу қарорни ўз иқтисодий хавфсизликлари учун қабул қилади», — деди Қодиров.
Чеченистон раҳбарининг фикрича, санкциялар «бир кишига, алоҳида бир гуруҳ одамларга эмас, балки бутун бир халққа қарши қаратилган».
«Бироқ аҳоли бундан ваҳимага тушмаслиги керак. Ҳаммаси яхши бўлади. Бу билан тегишли тузилмалар — Россия ҳукумати ва бошқалар шуғулланмоқда. Мен аввал ҳам бир неча бор айтгандим — биз санкциялардан хулоса чиқариб, уларни ўз фойдамизга ишлатишимиз керак. Ишончим комил, бу масалада тез орада муваффақиятга эришамиз», — дея қўшимча қилди Рамзан Қодиров.
Эслатиб ўтамиз, 30 июль, пайшанба куни АҚШ Украина шарқидаги воқеалар ва Қримнинг Россияга қўшиб олиниши муносабати билан Россияга нисбатан жорий этилган иқтисодий санкциялар кўламини янада кенгайтирди.
Изоҳ (0)