77 кишини ўлдиргани учун жазо ўтаётган норвегиялик террорчи Андерс Брейвик қамоқхона маъмурияти унинг ОАВларга йўналтирилган хатларини тутиб олаётгани ҳақида шикоят қилди, дея хабар бермоқда The Local.
21 йилга ҳукм қилинган экстремист таъкидлашича, шу вақтгача ўз мактубларининг 87 та нусхасини турли газета, телевидение, шунингдек алоҳида шахслар ва ташкилотларга жўнатган.
«Наҳотки улар мени тириклайин кўммоқчи эканлигини тушунмасангиз?» — деб ёзди Брейвик Dagbladet таҳририятига.
Ўтган йилнинг декабрида террорчи сақланаётган қамоқхона маъмурияти жиноятчининг хатларини у сиёсий ҳаракат тузмаслиги учун мусодара қилаётганини айтган эди. Бунда гап тахминан 220 та мактуб ҳақида бормоқда.
Аввалроқ 36 ёшли террорчи Андерс Брейвик Осло университетининг сиёсатшунослик факультетига қабул қилинган эди.
Эслатиб ўтамиз, Андерс Брейвик 2011 йилда Осло марказида ташкиллаштирган ва амалга оширган теракти оқибатида 77 киши ҳалок бўлиб, 151 киши жароҳат олган. 2012 йилда у 21 йиллик қамоқ жазосига маҳкум қилинган, бу жазо чекланмаган марта янгиланиши мумкин.
Изоҳ (0)