Қозоғистоннинг Олма-ота шаҳрида бўлиб ўтган халқаро хотира турнирида ўзбекистонлик Суҳроб Хўжаев босқон улоқтириш мусобақасида 78,22 метр натижа билан 2016 йилги Олимпиада ўйинлари йўлланмасини қўлга киритди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Мазкур мусобақада иштирок этган яна икки нафар ўзбекистонлик спортчи совринли ўринларни эгаллади. Сергей Дементьев диск (54,12 м) ва ядро (19,37 м) улоқтириш баҳсларида олтин медални қўлга киритган бўлса, узунликка сакрашда Тимур Хуснулин 7,66 метр кўрсаткич билан учинчи ўринни эгаллади.
Шу тариқа, ўзбекистонлик енгил атлетикачилар томонидан XXXI ёзги Олимпиада ўйинларига қўлга киритилган йўлланмалар сони 3 тага етди.
Эслатиб ўтамиз, бунга қадар Ситора Ҳамидова (марафон) ва Светлана Радзивил (баландликка сакраш) тўрт йилликнинг энг йирик спорт мусобақасида иштирок этиш ҳуқуқига эга бўлган эди.
Изоҳ (0)