Ҳиндистоннинг Бомбей шаҳрида 1993 йили амалга оширилган ва 250 дан ортиқ одамнинг ҳаётига зомин бўлган терактлар кетма-кетлиги ташкилотчиларидан бири — Ёқуб Мемонга нисбатан ўлим жазоси 30 июль куни ижро этилади. Бу ҳақда «РИА Новости» хабар бермоқда.
НДТВ телеканали маълумотларига кўра, ўлим жазоси амалга ошириладиган жой ва вақт Маҳараштра штати бош вазири Девендра Фаднавис томонидан тасдиқланган, судланувчининг оила аъзоларига бу ҳақда хабар берилган.
«Ёқуб Нагпур қамоқхонасида ёки Пунадаги Йервада қамоқхонасида осиб ўлдирилиши мумкин», — деди Нагпур қамоқхонаси суперинтенданти Йогеш Десаи.
Мемонга нисбатан ўлим ҳукми 2007 йили чиқарилган, 2013 йили эса мазкур ҳукмни Ҳиндистон Олий суди тасдиқлаган эди. Мемон терактларнинг бевосита ижрочиси бўлмаса-да, у жиноий тил бириктиришда айбдор деб топилди.
Мазкур жиноят иши бўйича асосий айбланувчи Ёқубнинг акаси, Тигр Мемон номи билан ҳам танилган криминал арбоб — Иброҳим Мемон ҳисобланади. У 1993 йили Ҳиндистонни тарк этган ва шундан бери унинг қаерда эканлиги номаълум.
1993 йилнинг 12 март куни Бомбейнинг турли ҳудудларида 12 портлаш юз берган, оқибатда 257 нафардан 300 нафаргача одам ҳалок бўлган, 700 га яқин киши турли даражада тан жароҳати олган.
Изоҳ (0)