Япониянинг Нагасаки префектурасида Henn-na номли роботлар хизмат қиладиган дунёдаги биринчи меҳмонхона очилди. Бу ҳақда япон матбуоти маълумотлари асосида «Korrespondent.net» хабар бермоқда.
Айни пайтда меҳмонхонада сунъий заковатга эга ўн «ходим» фаолият бошлаган: уч маъмур, тўрт швейцар, икки оқсоч ва бир гардероб учун жавоб берувчи. Машиналар, шунингдек, кофе тайёрлаш, хонани йиғиштириш, янги чойшаб ва ёстиқ жилдлар келтириш каби юмушларни ҳам бажаради. Уларни чорлаш учун ҳар бир меҳмонга бериладиган, махсус дастур билан жиҳозланган планшетдаги бир жуфт тугмани босиш кифоя.
Сунъий ақл вакиллари юраксиз машиналарга инсоний қиёфа бахш эта олган Koroko компанияси томонидан ишлаб чиқилди. Масалан, қабулхонадаги роботлар худди япон қизларига ўхшайди: нафас олади, кўзини пирпиратади, япон, хитой, корейс ва инглиз тилларида бемалол гаплашади.
Меҳмонхона унчалик катта эмас, бор-йўғи икки қават ва 72 та хонадан иборат. Агар ғоя муваффақиятли чиқиб, Henn-na танилиб кетгудек бўлса, мутахассислар бутун дунё бўйлаб мингга яқин шундай меҳмонхоналар очишни режалаштирган.
Изоҳ (0)