Қозоғистон 2019 йилгача Ҳиндистонга 5 минг тонна уран етказиб беради

Қозоғистон президенти Нурсултон Назарбоев мамлакат 2019 йилгача Ҳиндистонга 5 минг тонна уран етказиб беришини маълум қилди, деб хабар беради «Newskaz.ru».

«2015—2019 йилларда Ҳиндистонга беш минг тонна уран етказиб бериш бўйича шартнома тузилгани энергетика соҳасидаги ҳамкорлик ривожланиб бораётганидан далолат», — деди Назарбоев Ҳиндистон бош вазири Нарендра Моди билан ўтказилган музокаралар якунига бағишланган анжуманда.

Табиий уран концентратларини етказиб бериш бўйича тузилган шартнома Қозоғистон миллий атом компанияси «Казатомпром» ва Ҳиндистон атом энергияси департаменти томонидан имзоланди.

Нарендра Модининг Қозоғистонга расмий сафари 8 июлгача мўлжалланган.

Эслатиб ўтамиз, Ҳиндистон бош вазири 6 июль куни Тошкентга ташриф буюрган ва Ўзбекистон президенти Ислом Каримов билан музокаралар ўтказганди.