WikiLeaks АҚШ Миллий хавфсизлик агентлигининг Францияда саноат жосуслиги билан шуғулланганини тасдиқловчи навбатдаги махфий ҳужжатларни ошкор қилди, дея хабар бермоқда Eurointegration.com.ua.
МХАнинг жамоатчиликка маълум қилинган бешта ҳисоботига кўра, АҚШ 2004-2012 йиллар давомида франциялик дипломатлар ва ишбилармонлар ортидан кузатув ўрнатган. МХА Франция иқтисодиётининг барча стратегик соҳалари – рақамли технологиялар, электр, газ, нефт, атом энергетикаси ва бошқаларда жосуслик қилган.
Жосуслик ҳаракатлари турли йўллар билан – бизнес-режаларни ўғирлашдан тортиб технология ҳақидаги махфий ахборотни ноқонуний йўл билан қўлга киритишгача бўлган усуллар ёрдамида амалга оширилган. АҚШ жосуслик орқали олинган мазкур маълумотларнинг бир қисмини Буюк Британия, Канада, Австралия ва Янги Зеландия билан баҳам кўрган.
Аввалроқ WikiLeaks АҚШ махсус хизматлари Франциянинг юқори мартабали амалдорларини, хусусан, Франция президентлари Жак Ширак, Николя Саркози ва Франсуа Олландни кузатиб борганини тасдиқловчи махфий ҳужжатларни ошкор қилганди.
Изоҳ (0)