Мексиканинг энг йирик медиахолдингларидан бири ҳисобланган Grupo Televisa мексикалик меҳнат муҳожирлари ҳақида билдирган фикрлари сабаб АҚШ президентлигига номзод, миллиардер Дональд Трамп номи билан боғлиқ ҳар қандай лойиҳага нисбатан бойкот эълон қилди. Бу ҳақда «РИА Новости» хабар бермоқда.
Яқинда Трамп Мексика асосан гиёҳванд моддалар савдоси ва жиноятчилик билан шуғулланувчи энг ёмон одамларни АҚШга юборади, дея фикр билдирган эди.
«Жаноб Трамп мексикалик муҳожирларни на тушуна олди, на ҳурмат қилди ва бутун Мексика аҳолисини ҳақорат қилди», - дейилади холдинг баёнотида.
Шу муносабат билан Televisa Трампга алоқаси бўлган ҳеч бир лойиҳада, хусусан, «Олам гўзали» танловини ёритишда иштирок этиш имкониятини кўрмаяпти.
Televisa Мексиканинг энг йирик телеканалларидан бири ҳисобланади ва Лотин Америкасида испан тилида теледастурлар ишлаб чиқариш бўйича етакчи ўринлардан бирини банд этган.
Аввалроқ Американинг Univision ва NBC телеканаллари ҳам айнан мексикалик муҳожирлар ҳақида билдирган фикрлари сабаб Трамп билан ҳамкорлик қилишдан бош тортганди.
Изоҳ (0)