Греция парламенти давлат қарзи масаласида умумхалқ референдуми ўтказилиши учун овоз берди. Бу ҳақда «Новая газета» хабар бермоқда.
Парламет аъзоларига мурожаат қилган Греция бош вазири Алексис Ципрас кредиторлар томонидан қарзни қоплаш бўйича илгари сурилаётган шартларни «таҳқирловчи» деб атади. У, шунингдек, Греция халқини мамлакатга таклиф қилинаётган шартларга қарши овоз беришга чақирди.
Айни вақтда, Еврогуруҳ раиси Йерун Дейсселблум жорий кўмак дастури якунига етганидан сўнг ҳам грекларга ёрдам беришга тайёр эканлигини маълум қилди.
Алексис Ципрас 27 июнга ўтар кечаси давлат қарзи масаласида референдум ўтказиш ниятида эканлигини эълон қилганди. Унинг сўзларига кўра, кредиторлар ҳозирги вақтда қиймати 300 миллиард доллардан ошиб кетган қарзни ижтимоий тўловларни камайтириб, солиқларни ошириш йўли билан қайтаришни таклиф қилган.
Ципраснинг қайд этишича, референдум 5 июль куни бўлиб ўтиши керак. Унда кредиторларнинг шартларига рози бўлиш ёки бўлмаслик масаласи муҳокамага қўйилади.
Изоҳ (0)