GM Uzbekistan 2015 йил октябридан бошлаб газда ҳаракатланувчи фақат Lacetti автомобилларини ишлаб чиқаради
Жорий йилнинг октябрь ойидан бошлаб GM Uzbekistan қўшма корхонаси экомобилларни серияли тарзда ишлаб чиқаришни йўлга қўйиши хабар қилинганди. «Автосаноат» ахборот хизмати айнан қайси турдаги автомобилларга газ баллон ускуналари қўйилиши юзасидан «Дарё»га изоҳ берди.
«Сўнгги йилларда атроф-муҳит экологиясини яхшилашга алоҳида эътибор қаратилмоқда. Бу борада юртимизда ҳам самарали ишлар амалга оширилмоқда. Жумладан, автотранспорт воситаларини босқичма-босқич экологик тоза ёнилғи турларига мослаштирилаётгани фикримизнинг далилидир. Жорий йилнинг тўртинчи чорагидан бошлаб GM Uzbekistan АЖ автомобиль заводида Lacetti автомобилларини газ баллон ускуналари билан жиҳозланган ҳолда ишлаб чиқариб, харидорларга етказиш йиллик ишлаб чиқариш режасига киритилган.
Мамлакатимизда фаолияти йўлга қўйилган ‘Автосаноат—Landi Renzo’ қўшма корхонаси айнан мазкур автомобиллар учун газ таъминоти тизими ускуналарини шартнома асосида Асака автомобиль заводига етказиб беради. Мазкур корхона, шу пайтгача GM Uzbekistan АЖнинг юртимиздаги расмий дилерлик марказларини сифатли газ баллон ускуналари билан таъминлаб келмоқда.
Шуни айтиб ўтиш лозимки, Lacetti автомобилларини экологик тоза ёқилғи турига мослаштирилган ҳолда ишлаб чиқаришда харидорларнинг талаб ва истаклари алоҳида эътиборга олинади», — дейилади «Автосаноат» ахборот хизмати берган хабарда.
Харидорларнинг хоҳишига биноан заводда Lacetti автомобилларига газ баллон ускуналари ўрнатиб берилади. Заводда ўрнатилган ускуналар юқори сифати ва хавфсизлиги билан бошқалардан фарқ қилади.
