Ўзбекистон Республикаси Меҳнат ва аҳолини ижтимоий муҳофаза қилиш вазирлиги тасарруфида 70 йилдан ортиқ тарихга эга бўлган имкониятлари чекланган шахслар учун ихтисослаштирилган ўрта махсус, касб-ҳунар таълим муассасалари Тошкент ва Фарғона шаҳарларида ўз фаолиятини давом эттириб келмоқда, деб хабар беради вазирлик матбуот хизмати.
Имкониятлари чекланган шахслар учун ихтисослаштирилган Республика касб-ҳунар коллежида республиканинг барча ҳудудларидан келган заиф кўрувчи ва кўзи ожизлар, ҳаракат-таянч аъзолари касалликлари, заиф эшитувчи ва кар-соқовлар, ҳамда умумий касалликлар бўйича ногиронлик гуруҳига эга бўлган 490 нафар ўқувчи таҳсил олади.
Бугунги кунда коллежда бухгалтерия, тикувчилик ишлаб чиқариш, радиотехника ва телеаппаратураларга хизмат кўрсатиш ва таъмирлаш, компьютер ва компьютер тармоқларини ишлатиш ва уларнинг дастурий таъминоти, маиший хизмат машина ва асбобларини таъмирлаш электромеханиги, поябзал иши, тўқувчилик ишлаб чиқариш каби еттита йўналиш бўйича таълим берилмоқда.
Битирувчи ўқувчиларнинг ёши бўйича бўлинишидан кўринадики, 19 ёшдан 21 ёшгача бўлган ўқувчилар 2014/2015-ўқув йилларидаги битирувчи ўқувчилар контингентининг асосий қисмини ташкил этади. 15 ёшдан 18 ёшгача ва 22 ёшдан юқори бўлган битирувчи ўқувчилар эса контингентининг нисбатан камроқ қисмини ташкил этади.
Коллеж ўқувчиси Зайниддинов Сирож 2011 йилда заиф эшитувчилар ўртасида ўтказилган халқаро шахмат мусобақасида фахрли 1-ўринни эгаллади. 2012 йил 3-босқич ўқувчиси Шобердиев Яшин Лондондаги 2012 йилги паралимпия ўйинларида муваффақиятли иштирок этди. 2013 йилда Бирлашган Араб Амирликларида ўтказилган халқаро пауэрлифтинг турнирида коллеж ўқувчиси Қўзиева Рўза иштирок этиб, совринли учинчи ўринни эгаллади. 2014 йил Корея давлатининг Инчеон шаҳрида сузиш бўйича бўлиб ўтган Пароосиё ўйинларида Абдухалилов Умид иштирок этди.
Коллежда дарс машғулотларидан кейин ўқувчиларнинг бўш вақтларини мазмунли ўтказишлари учун жами 9 йўналишдаги 52 та тўгарак фаолият кўрсатмоқда.
Изоҳ (0)