O‘zbekiston Respublikasi Mehnat va aholini ijtimoiy muhofaza qilish vazirligi tasarrufida 70 yildan ortiq tarixga ega bo‘lgan imkoniyatlari cheklangan shaxslar uchun ixtisoslashtirilgan o‘rta maxsus, kasb-hunar ta’lim muassasalari Toshkent va Farg‘ona shaharlarida o‘z faoliyatini davom ettirib kelmoqda, deb xabar beradi vazirlik matbuot xizmati.
Imkoniyatlari cheklangan shaxslar uchun ixtisoslashtirilgan Respublika kasb-hunar kollejida respublikaning barcha hududlaridan kelgan zaif ko‘ruvchi va ko‘zi ojizlar, harakat-tayanch a’zolari kasalliklari, zaif eshituvchi va kar-soqovlar, hamda umumiy kasalliklar bo‘yicha nogironlik guruhiga ega bo‘lgan 490 nafar o‘quvchi tahsil oladi.
Bugungi kunda kollejda buxgalteriya, tikuvchilik ishlab chiqarish, radiotexnika va teleapparaturalarga xizmat ko‘rsatish va ta’mirlash, kompyuter va kompyuter tarmoqlarini ishlatish va ularning dasturiy ta’minoti, maishiy xizmat mashina va asboblarini ta’mirlash elektromexanigi, poyabzal ishi, to‘quvchilik ishlab chiqarish kabi yettita yo‘nalish bo‘yicha ta’lim berilmoqda.
Bitiruvchi o‘quvchilarning yoshi bo‘yicha bo‘linishidan ko‘rinadiki, 19 yoshdan 21 yoshgacha bo‘lgan o‘quvchilar 2014/2015-o‘quv yillaridagi bitiruvchi o‘quvchilar kontingentining asosiy qismini tashkil etadi. 15 yoshdan 18 yoshgacha va 22 yoshdan yuqori bo‘lgan bitiruvchi o‘quvchilar esa kontingentining nisbatan kamroq qismini tashkil etadi.
Kollej o‘quvchisi Zayniddinov Siroj 2011-yilda zaif eshituvchilar o‘rtasida o‘tkazilgan xalqaro shaxmat musobaqasida faxrli 1-o‘rinni egalladi. 2012-yil 3-bosqich o‘quvchisi Shoberdiyev Yashin Londondagi 2012-yilgi paralimpiya o‘yinlarida muvaffaqiyatli ishtirok etdi. 2013-yilda Birlashgan Arab Amirliklarida o‘tkazilgan xalqaro pauerlifting turnirida kollej o‘quvchisi Qo‘ziyeva Ro‘za ishtirok etib, sovrinli uchinchi o‘rinni egalladi. 2014-yil Koreya davlatining Incheon shahrida suzish bo‘yicha bo‘lib o‘tgan Paroosiyo o‘yinlarida Abduxalilov Umid ishtirok etdi.
Kollejda dars mashg‘ulotlaridan keyin o‘quvchilarning bo‘sh vaqtlarini mazmunli o‘tkazishlari uchun jami 9 yo‘nalishdagi 52 ta to‘garak faoliyat ko‘rsatmoqda.
Izoh (0)