Халқ таълими вазирлиги томонидан ташкил этилган «Йилнинг энг яхши инглиз тили ўқитувчиси» кўрик-танлови ва ўқувчилар ўртасида «Инглиз тили билимдонлари» интеллектуал мусобақасининг якуний республика босқичи бўлиб ўтмоқда. Бу ҳақда Халқ таълими вазирлиги ахборот хизмати хабар қилмоқда.
«Йилнинг энг яхши инглиз тили ўқитувчиси» кўрик-танлови 3 босқичда ўтказилмоқда. Танловнинг дастлабки босқичида 2 мингга яқин инглиз тили ўқитувчилари 250 тагача сўздан иборат эссеси билан иштирок этдилар. Улар орасидан 75 % ва ундан юқори натижа кўрсатган талабгорлар ҳудудий халқ таълими бошқарув идораларига жўнатилди.
Танловнинг иккинчи босқичида 232 нафар ўқитувчининг дарс ишланмаси ва видеодарси баҳоланиб, ҳар бир ҳудуддан энг юқори балл тўплаган 5 нафардан иштирокчи танловнинг учинчи босқичида иштирок этиш ҳуқуқини қўлга киритди.
Давом этаётган учинчи босқичда барча иштирокчилар Британия кенгашининг Ўзбекистондаги ваколатхонаси томонидан ўтказиладиган APTIS тест саволларида иштирок этади. Ушбу тест саволлари орқали умумевропа компетенциялари CEFR талаблари доирасида чет тили ўқитувчиларининг ўқиш (R-reading), тинглаб тушуниш (L-listening), гапириш (S-speaking), грамматик ва лексик (GV – grammar and vocabular) билимлари баҳоланмоқда.
Якунда 1 нафардан 1—3-ўринни эгаллаган ғолиблар аниқланади. 1-ўринга «Халқ таълими аълочиси» кўкрак нишони ҳамда кубок берилади. Республика босқичида энг юқори натижа кўрсатган 40 га яқин чет тили ўқитувчилари Буюк Британиянинг нуфузли марказларида малака ошириш учун йўлланмага эга бўлади.
«Инглиз тили билимдонлари» интеллектуал мусобақаси икки босқичда: ҳудудий ва республика босқичларида ўтказилиб, унинг ҳудудий босқичда ҳар битта туман (шаҳар)дан биттадан жамоа иштирок этди. Жамоа аъзолари 5—9-синфларнинг ҳар биридан бир нафардан ўқувчи қатнашди.
Мусобақалар 3 та шартдан иборат бўлиб, бунда ўқувчиларнинг ўқиш, ёзиш, тинглаб тушуниш ва гапириш компетенциялари ҳамда улар томонидан инглиз тилидан тайёрланган саҳна кўриниши баҳоланади.
Изоҳ (0)