Жаҳон банки вакилларидан иборат гуруҳ «Жанубий Қорақалпоғистонда сув ресурслари бошқарувини яхшилаш» лойиҳасига киритилган ҳудудлар билан танишиш учун Қорақалпоғистоннинг Беруний туманига ташриф буюрди, дея хабар бермоқда Telegraf.uz.
Мазкур лойиҳа 2016-2021 йиллар давомида Бутунжаҳон банки кредитлари ва Ўзбекистон ҳукуматининг маблағлари эвазига амалга оширилади. Лойиҳанинг умумий қиймати 376,7 миллион АҚШ долларини ташкил этади.
Лойиҳа доирасида Беруний, Тўрткўл ва Элликқалъа туманларида сув таъминотини яхшилаш мақсадида, узунлиги 70 километрга, ўтказиш имконияти эса сониясига 105 куб метр сувга тенг «Бўстон» бетонли магистрал каналини қуриш, узунлиги 31,1 километр, ўтказиш имконияти сониясига 160 куб метр сув бўлган Туямўйин магистрал каналини, узунлиги 27,5 километрга тенг «Пахта-арна» магистрал каналини, 375-километрли хўжаликлараро каналларни реконструкция қилиш ва уларнинг гидротехник иншоотларини таъмирлаш кўзда тутилган.
Натижада, 100 минг га суғориладиган ерларда сув ресурсларини бошқариш яхшиланиб, уларнинг фойдали иш коэффициенти кўтарилади, Туямўйин сув омборларидан мазкур ҳудудларга мустақил оқадиган сув узатиш имкони пайдо бўлади. Шунингдек, фермер хўжаликлари ва сув истеъмолчилари уюшмаларининг 544 дона насос агрегатлари ишлари тўхтатилиши ҳисобига ҳар йили 14,5 миллиард сўм маблағ иқтисод қилинади.
Бундан ташқари, лойиҳада пахта териш комбайнларини харид қилиш ва пахта тозалаш заводларига етказиб бериш ҳам назарда тутилган бўлиб, пахта теримини механизациялаштириш ҳисобига заводлардаги ишлаб чиқариш харажатлари камаяди. Умуман олганда, лойиҳани амалга ошириш натижасида экин далаларининг ҳосилдорлиги ортиб, харажатлар қисқаради.
Изоҳ (0)