Ўзбекистон Адлия вазирлигида бўлиб ўтган матбуот анжуманида Юридик шахсларни давлат рўйхатидан ўтказишнинг ҳуқуқий асослари йўналишида амалга оширилаётган ишлар ҳақида атрофлича маълумот берилди. Бу ҳақда Infocom.uz хабар бермоқда.
Вазирлар Маҳкамасининг 2013 йил 25 ноябрдаги «Тадбиркорлик субъектларини интернет тармоғи орқали давлат рўйхатидан ўтказиш механизмини жорий этиш чора-тадбирлари тўғрисида»ги қарорига асосан тадбиркорлик субъектлари нафақат давлат рўйхатидан ўтиш учун, балки рухсат берувчи ҳужжатларни расмийлаштириш учун ҳам интернет тармоғи орқали мурожаат қилиши мумкинлиги белгиланди.
Шуни алоҳида таъкидлаш керакки, тадбиркорлик субъектларини интернет тармоғи орқали давлат рўйхатидан ўтказиш механизми 2014 йил 1 январдан жорий этилган. Ўтган 2014 йил давомида тадбиркорлик субъектларидан интернет орқали адлия органларига ҳамда туман (шаҳар) ҳокимлигидаги тадбиркорлик субъектларини рўйхатга олиш инспексияларига жами 10127 та ва жорий йилнинг биринчи чораги давомида эса 9021 та мурожаатлари келиб тушган.
Мазкур рақамларга эътибор берадиган бўлсак, ўтган 2014 йилда келиб тушган мурожаатларнинг 89 фоизи шу йилнинг уч ойига тўғри келмоқда. Бу эса интернет тармоғи орқали мурожаат этаётган фуқароларга тадбиркорлик фаолиятини олиб боришда қулайлик ва имкониятлар кенгаяётганлигининг тасдиғидир.
Изоҳ (0)