O‘zbekiston Adliya vazirligida bo‘lib o‘tgan matbuot anjumanida Yuridik shaxslarni davlat ro‘yxatidan o‘tkazishning huquqiy asoslari yo‘nalishida amalga oshirilayotgan ishlar haqida atroflicha ma’lumot berildi. Bu haqda Infocom.uz xabar bermoqda.
Vazirlar Mahkamasining 2013-yil 25-noyabrdagi “Tadbirkorlik subyektlarini internet tarmog‘i orqali davlat ro‘yxatidan o‘tkazish mexanizmini joriy etish chora-tadbirlari to‘g‘risida”gi qaroriga asosan tadbirkorlik subyektlari nafaqat davlat ro‘yxatidan o‘tish uchun, balki ruxsat beruvchi hujjatlarni rasmiylashtirish uchun ham internet tarmog‘i orqali murojaat qilishi mumkinligi belgilandi.
Shuni alohida ta’kidlash kerakki, tadbirkorlik subyektlarini internet tarmog‘i orqali davlat ro‘yxatidan o‘tkazish mexanizmi 2014-yil 1-yanvardan joriy etilgan. O‘tgan 2014-yil davomida tadbirkorlik subyektlaridan internet orqali adliya organlariga hamda tuman (shahar) hokimligidagi tadbirkorlik subyektlarini ro‘yxatga olish inspeksiyalariga jami 10127 ta va joriy yilning birinchi choragi davomida esa 9021 ta murojaatlari kelib tushgan.
Mazkur raqamlarga e’tibor beradigan bo‘lsak, o‘tgan 2014-yilda kelib tushgan murojaatlarning 89 foizi shu yilning uch oyiga to‘g‘ri kelmoqda. Bu esa internet tarmog‘i orqali murojaat etayotgan fuqarolarga tadbirkorlik faoliyatini olib borishda qulaylik va imkoniyatlar kengayayotganligining tasdig‘idir.
Izoh (0)