Таиланд Қуролли кучлари қўмондонлиги АҚШ ҳарбийларидан беш кун ичидан Пхукет оролидан барча самолётлар ва ҳарбий хизматчиларни олиб чиқиб кетишни талаб қилди. Бу ҳақда RBC.ru хабар бермоқда.
Пхукетда турган АҚШ ҳарбий контингенти сувости кемаларига қарши Guardian Sea машғулотларида иштирок этганди. Машғулотлар 20 май куни якунига етган, бироқ Вашингтон Таиланд ҳарбийларидан Пхукет ороли аэропортида база ташкил этишга рухсат сўраганди.
АҚШнинг тушунтирича, ушбу база денгизда қолиб кетаётган роҳинжалар – Мьянмадаги мусулмон халқи вакилларини қутқариш ишлари билан шуғулланиши керак эди. Ушбу халқ вакиллари Мьянмада сиқиб чиқарилмоқда.
Таиланд ҳарбий доираларидаги манбанинг маълум қилишича, Таиланд ҳукумати АҚШ одам савдоси масалалари юзасидан тергов ўтказиш ва қочоқ роҳинжалар муаммосини ҳал қилиш масаласида босим ўтказиши мумкинлигидан хавотирда.
Аввалроқ АҚШ, Европа Иттифоқи ва БМТ Таиландни тоқатли бўлишга чақириб, Мьянманинг буддавий аҳолиси томонидан амалга оширилаётган таъқиб натижасида Мьянмани оммавий равишда тарк этаётган роҳинжа муҳожирларига ёрдам кўрсатишга чорлаганди.
Ўз навбатида Таиланд мудофаа вазири Правит Вонгсуван унинг мамлакати қочиқ роҳинжаларга ёрдам беришга тайёрлигини, бироқ улар учун ўз ҳудудида лагерлар ташкил этмаслигини маълум қилганди.
Изоҳ (0)