Ўзбекистоннинг 68та корхонасидаги давлат активлари хорижий инвесторларга сотиб олиш учун таклиф қилинади. Бу ҳақда, «Gazeta.uz»нинг хабар беришича, Ўзбекистон Президентининг 28 апрелдаги қарорида белгилаб қўйилган.
Қарорга мувофиқ ташкил этиладиган махсус ҳукумат комиссияси бир ойлик муддат ичида давлат активлари хорижий стратегик ҳамкорларга сотилиши керак бўлган 48та корхона ва молиявий муассасани баҳолаш ва савдога қўйиш жадвалини тасдиқлаши керак.
Давлат улуши сотувга қўйиладиган корхоналар орасида кимё саноатининг «Навоийазот» (49 фоизи сотилади), «Фарғонаазот» (48,5 фоиз) каби йирик корхоналари, қурилиш соҳасидаги «Қизилқумцемент» (35,9 фоиз), автомобилсозлик соҳасидаги «Жиззах аккумлятор заводи» (33 фоиз), «Алоқабанк» (47,6 фоиз), «Туронбанк» (63,1 фоиз), «Ўзагросуғурта» (24,6) каби молия институтлари бор.
Йирик саноат корхоналарининг мулкларини сотувга қўйишдан ташқари, 343та хўжалик субъектлари ва корхоналарнинг давлат улушларини очиқ савдолар орқали, модернизация қилиш шарти билан хусусий тадбиркорларга сотиш кўзда тутилган.
Бундан ташқари, 512та давлат мулки объектларини, хусусан, қурилиши якунламаган иншоотларни танлов асосида инвестиция мажбуриятларини қабул қилиш шарти билан «нол» қийматида сотиш режалаштирилган.
Президент қарорида паст рентабелли ва фаолият олиб бормаётган 257та корхона рўйхати келтирилган бўлиб, улар бўйича тугатиш ва банкротлик жараёнлари бошланади.
Изоҳ (0)