Ўзбекистонга ташриф буюрган Малайзия туризм ва маданият вазири Муҳаммад Назри бин Абдул Азиз бошчилигидаги делегация 24 апрель куни «Ўзбектуризм» раҳбарияти билан учрашув ўтказди. Бу ҳақда UzDaily хабар бермоқда.
Учрашув давомида Ўзбекистон томони асосий сайёҳлик йўналишлари, биринчи галда, Самарқанд, Бухоро, Хоразм, Тошкент ва Сурхондарё вилоятларида катта бўлмаган меҳмонхона мажмуалари, дам олиш ва овқатланиш шохобчалари қурилишига Малайзиядан тўғридан-тўғри инвестициялар киритилишидан манфаатдор эканлигини маълум қилди.
Ўз навбатида, малайзиялик вазир самимий қабул учун миннатдорчилик билдириб, малайзияликлар жаҳонга машҳур сайёҳлик марказлари – Самарқанд, Бухоро, Хивага, уларнинг ислом тарихи ва маданияти билан боғлиқ улуғвор обидаларига ташриф буюришга катта қизиқиш билдираётганликларини таъкидлади.
Катта инвестиция имкониятлари борлигини ҳисобга олиб, Малайзия томони мамлакат инвесторларига Ўзбекистоннинг туристик имкониятлари ҳақида ахборот бериш борасида ҳамкорлик ўрнатишдан манфаатдорлигини билдирди.
Муҳаммад Назри бин Абдул Азиз 2005 йили имзоланган амалдаги ҳукуматлараро Англашув меморандуми асосида «Ўзбектуризм» ва Малайзия туризм ва маданият вазирлиги ўртасида халқаро битим имзолаш борасида таклифни кўриб чиқишга тайёрлигини билдирди.
Изоҳ (0)