«Келажак овози» ёшлар ташаббуслари маркази ва «Камолот» ёшлар ижтимоий ҳаракати Intellect2All ахборот технологиялари лойиҳалари бўйича республика танловида иштирок этиш шартларини эълон қилди. Бу ҳақда Uzbekistan Today хабар бермоқда.
Intellect2All – 15 ёшдан 30 ёшгача бўлган, ахборот технологияларига қизиққан, ўзининг илғор ғояларини амалга оширишга уринаётган ўғил-қизлар иштирок этиш мумкин бўлган танловдир. Танловда ёшлар ўзларини уч номинацияда синаб кўришлари мумкин: веб-иловалар, мобил ишланмалар ва виртуал ҳаёт учун иловалар ишланмаси (Oculus Rift ва Google Cardboard учун иловалар).
Ўзбекистоннинг тўрт ҳудудида бўлиб ўтадиган танлов саралаш босқичида қатнашчилар жамоаларга бўлиниб, жамоа лойиҳаси концепциясини ишлаб чиқишади. Шундан сўнг ёшлар тренер-ўқитувчилари билан бирга лойиҳани тайёрлаш устида ишлаб, эришган натижалари тақдимотини ўтказишади.
Энг яхши натижа кўрсатган жамоалар финал босқичига йўлланма олади ва танлов бош соврини – лойиҳани ҳаётга татбиқ этиш учун бошланғич пул мукофоти учун куч синашади. Шунингдек, ғолиблар ахборот технологияларининг хориждаги энг сўнгги янгиликларига бағишланган бир қатор маҳорат дарслари ва тақдимотларида иштирок этиш имкониятига эга бўлади.
Изоҳ (0)