Америкалик машҳур актёр Роберт Де Ниро Италияда янги лойиҳа бошламоқда. ТАСС хабарига кўра, 71 ёшли Де Ниро Италиянинг жаҳондаги тимсолига айланган машҳур автомобиль маркаси асосчиси Энцо Феррари ролини ўйнайди.
Маҳаллий ОАВнинг Де Ниронинг ўзига асосланиб хабар беришича, асосий қисми Италияда суратга олинадиган фильмга Энцонинг ўлимидан етти йил аввал – 1981 йили чиқарган «Ferrari-80» номли автобиографик китоби асос қилиб олинган.
Шунга қарамай, бир вақтнинг ўзида фильм продюсери ҳам ҳисобланган Роберт Де Ниронинг сўзларига кўра, бу шунчаки биографик ҳикоя эмас, балки «персонаж ҳаётининг барча хорғин ва ёрқин томонлари, муваффақият ва ташвишлари билан бирга жонлантиришга уриниш» бўлади.
«Бюджети катта бўлган бу фильм «Ferrari» деб номланади. Драма жанрида суратга олиниши режалаштирилаётган фильм анча катта – 1945 йилдан 1980 йилгача бўлган даврни қамраб олади», - деди Де Ниро.
Агар режиссёр сифатида Клинт Иствудни таклиф қилиш уддасидан чиқилса, лойиҳа қиймати янада ошади. «Биз унга таклиф билан чиқдик ва у қизиқиш билдирди, бироқ дастлаб сценарийга баҳо бермоқчи», - деди Голливуддаги италиялик нуфузли продюссерлардан бири Жанни Боццаки.
Тахминларга кўра сценарий устида Оливер Стоуннинг «Никсон» (1995 йилда суратга олинган) фильмидаги иши учун «Оскар»га лойиқ кўрилган Стивен Ривел ва Кристофер Уилкинсон ишлаши мумкин.
«Ferrari» фильми 2016 йилда экранларга чиқиши режалаштирилган.
Изоҳ (0)