Бугун,

  • USD 11095.31
  • RUB 173.84
  • EUR 10772.44

Бухоро вилоятида эни 10, узунлиги 197 километр бўлган саксовулзорлар барпо этилмоқда, деб хабар беради Ўзбекистон Миллий ахборот агентлиги.

Бухоро манзаралари. Фото: uzinfoinvest.uz

Бухоро манзаралари. Фото: uzinfoinvest.uz

«Яшил қалқон» лойиҳаси доирасида ташкил этилаётган 197 минг гектар чўл дарахтлари шимоли-ғарб ва ғарб томондан Қизилқум саҳросига ёндош кенгликлардаги экинзорларни табиий офатлардан муҳофаза қилишда муҳим аҳамиятга эга.

«Ёзнинг айни чилласида эсадиган саҳронинг иссиқ шамоли – гармсел деҳқончиликка, айниқса, пахтачиликка салбий таъсир кўрсатади, – деди Бухоро вилояти қишлоқ ва сув хўжалиги бошқармаси бошлиғи, қишлоқ хўжалик фанлари номзоди Фарҳод Жумаев. – У тупроқда нам бўлмаган ҳолларда ғўза гули ва кўсагини қовжиратади. Иссиқ шамол чўлга яқин пахта майдонлари ҳосилдорлигининг 5-7 центнер камайишига олиб келади. Гармсел йўлига ғов қўйиш, унинг таъсирини камайтириш, шунингдек, Орол денгизидан кўтарилиб, шамол орқали экин майдонлари узра ёпириладиган зарарли модда ва тузларнинг муайян қисмини ушлаб қолиш ва қум кўчишининг олдини олишда «яшил қалқон» ўзига хос ишончли табиий иҳота вазифасини ўтайди».

«Яшил қалқон» лойиҳаси доирасида Ғиждувон, Шофиркон, Пешку, Ромитан, Жондор, Қоракўл, Қоровулбозор туманларининг саҳро ҳудудлари бўйлаб саксовулзорлар барпо этилмоқда.

Бухоро марказий давлат ўрмон хўжалиги раҳбари Абдураззоқ Бобоқуловнинг таъкидлашича, жорий йилнинг дастлабки уч ойида 2 минг 20 гектар майдонга бир миллион тупдан зиёд чўл кўчатлари ўтқазилди. Бундан ташқари, мазкур майдонларга саксовул уруғи ҳам экилди. Ўрмон хўжаликларида 71 гектар майдонда ниҳол етиштирилаётгани, кузда эса пишган саксовул уруғи йиғиштирилиб, захира яратилгани ишнинг муваффақиятини таъминламоқда.

Бухоролик ўрмончилар «Яшил қалқон» лойиҳасини кузда давом эттиришга ҳам пухта тайёрланмоқда. Режага кўра, ноябрь декабрь ойларида 6000 гектарга яқин майдонга саксовул кўчатлари экилади.

Лойиҳага киришилгандан буён ўтган қарийб 14 йил вақт мобайнида жами 81,5 минг гектар майдонда «яшил қалқон» барпо этилди. Бу иш давлат бюджети ва хўжаликлар маблағлари ҳамда вилоят табиатни муҳофаза қилиш қўмитасининг ҳомийлиги кўмагида амалга оширилмоқда.

Изоҳ
Асосий янгиликлар
Иқтисодиёт
Ўзбекистонда январь ойида кимларга энг юқори маош таклиф қилинди?
Дунё
“Россия ютқазади, Украина ғалабаси дунёни ўзгартиради”: Зеленский Буюк Британия парламентида нутқ сўзлади (видео)
Маҳаллий
Қорақалпоғистондаги уйда газ портлаши оқибатида бир киши вафот этди