Bangladeshda davom etayotgan Yoshlar o‘rtasidagi Osiyo chempionatiga saralash o‘yinlaridan o‘rin olgan Bangladesh va O‘zbekiston yoshlar terma jamoalari o‘rtasidagi uchrashuv o‘z nihoyasiga yetdi, deya xabar bermoqda “Uff.uz”.
Unda Baxtiyor Ashurmatov shogirdlari yirik hisobda g‘alaba qozonishdi. Shuni alohida ta’kidlash kerakki, Ashurmatov mazkur o‘yinda avvalgi Hindistonga qarshi uchrashuvdan farqli ravishda asosiy tarkibda bir qator o‘zgarishlar qildi. Jumladan, avvalgi o‘yinni boshidan boshlagan Vladimir Kozak, Jamshid Iskanderov, Igor Sergeyev kabi yetakchilar zaxirada qolishdi. Bosh murabbiy ularni hal qiluvchi bo‘lgan Suriyaga qarshi o‘yinga saqlab qo‘ydi, deb taxmin qilish mumkin. Ushbu o‘yinda asosiy tarkibda tushgan futbolchilar ham ishonchni to‘liq oqlashdi. 3-daqiqadayoq Jaloliddin Masharipov aniq zarba bilan hisobni ochdi. Keyin 13 va 29-daqiqalarda shu kun terma jamoani sardor sifatida maydonga boshlab tushgan Sardor Rahmonov ikkita gol kiritib, hisobni ishonchli ko‘rinishga olib keldi.
Oradan 10 daqiqa o‘tib Abbosbek Maxstaliyev O‘zbekistonning to‘rtinchi golini ham kiritdi. Ikkinchi bo‘limni ham vakillarimiz ancha faol boshlashdi. Ammo 55-daqiqada hujumchimiz Alisher Shog‘ulomov kerakmas joyda raqibga nisbatan qo‘pollik ishlatib, maydondan chetlatildi. 69-daqiqada bu borada maydonda vaziyat tenglashdi. Bangladesh yoshlar terma jamoasi a’zosi Rayyon ham hakam tomonidan maydondan chetlatildi. Shu tariqa O‘zbekiston yoshlar terma jamoasi guruhdagi ikkinchi o‘yinda Bangladesh ustidan yirik hisobda g‘alaba qozonib, o‘z ochkolari sonini 6 taga yetkazib oldi. Guruhda 1-o‘rinni hozircha Suriya terma jamoasi egallab turibdi. Ular faqatgina to‘plar nisbatiga ko‘ra vakillarimizdan yuqoridalar.
Bangladesh U23 - O‘zbekiston U23 — 0:4
Gollar: J.Masharipov (3), S.Rahmonov (13, 29), A.Maxstaliyev, 39
Bangladesh U23: Liton, Topu, Rayyon, Yosin Xon, Nahid, Muhammad Atiyqur, Jabal Rana, Gemonta Sinvent, Saxel Rana, Shokir Ahmad, Vohid.
O‘zbekiston U23: Akmal Tursunboyev, Akromjon Komilov, Sardor Rahmonov, Abbos Maxstaliyev, Hasan Asqarov, Javlon Mirabdullayev, Javohirbek Rasulov, Sardor Sobirxo‘jayev, Jaloliddin Masharipov, Temur Ayupov, Alisher Shog‘ulomov.
Izoh (0)