Сингапурнинг марҳум биринчи бош вазири Ли Куан Ю билан видолашув маросими бўлиб ўтмоқда, дея хабар берди «РБК». Маросим маҳаллий парламент биносида ўтказилмоқда, у ерга марҳумнинг жасади солинган тобут келтирилди. Вазир билан хайрлашиш учун минглаб кишилар ташриф буюрди.
Сингапурда бир ҳафталик мотам эълон қилинди. Сиёсатчини дафн этиш маросими 29 март куни 14:00 да (Тошкент вақти билан 11:00 да) бўлиб ўтади.
Мустақил Сингапурнинг биринчи бош вазири Ли Куан Ю 22 март куни узоқ давом этган касалликдан сўнг 91 ёшида вафот этди.
Сингапур давлатининг асосчиси бешинчи февраль куни ўткир зотилжам касаллиги билан шифохонага ётқизилган эди. Бош вазир матбуот хизмати 18 март куни Ли Куан Юнинг аҳволи ёмонлашгани ҳақида баёнот берди.
Маълумот учун, Ли Куан Ю Сингапур ҳукумати тепасига 1959 йилда келган бўлиб, давлатни 1990 йилгача узлуксиз бошқарган. Айнан унинг даврида Сингапур қашшоқ давлатлар қаторидан чиқиб, дунёнинг молиявий марказларидан бирига айланган, аҳоли турмуш даражаси бўйича эса юқори учликдан жой олган.
Изоҳ (0)