Олимлар қуриб қолган Марс кўлидан Curiosity марсоходи томонидан олинган тупроқ намунасини қайта таҳлил қилиб, қадимий кўл азотнинг юқори даражасига эга бўлганини аниқлади, дея хабар бермоқда «Российская газета».
Аниқланган нитрат ва азотнинг бошқа бирикмалари ҳаётни ўзлаштириш учун яроқли бўлиб чиқди. Аввалига олимлар топилган «ҳаёт ғиштчалари»ни Curiosity бортида жойлашган микролабораториядаги ерга хос чанглар деб ўйлади, бироқ бошқа намуналар ҳам худди шундай натижаларни кўрсатди. Демак, қадимий Марсдаги сувлар тирик организмлар ривожланиши учун яроқли азотга бой бўлган, дея хулоса қилмоқда олимлар.
Шу билан бирга, улар топилган азот бирикмалари Марсда ҳаёт бўлганлигидан далолат бермаслигини қайд этди — таҳлил шуни кўрсатдики, синил кислотаси ва азотлар оксиди органик бўлмаган муҳитдан келиб чиққан.