Singapurning marhum birinchi bosh vaziri Li Kuan Yu bilan vidolashuv marosimi bo‘lib o‘tmoqda, deya xabar berdi “RBK”. Marosim mahalliy parlament binosida o‘tkazilmoqda, u yerga marhumning jasadi solingan tobut keltirildi. Vazir bilan xayrlashish uchun minglab kishilar tashrif buyurdi.
Singapurda bir haftalik motam e’lon qilindi. Siyosatchini dafn etish marosimi 29-mart kuni 14:00 da (Toshkent vaqti bilan 11:00 da) bo‘lib o‘tadi.
Mustaqil Singapurning birinchi bosh vaziri Li Kuan Yu 22-mart kuni uzoq davom etgan kasallikdan so‘ng 91 yoshida vafot etdi.
Singapur davlatining asoschisi beshinchi fevral kuni o‘tkir zotiljam kasalligi bilan shifoxonaga yotqizilgan edi. Bosh vazir matbuot xizmati 18-mart kuni Li Kuan Yuning ahvoli yomonlashgani haqida bayonot berdi.
Ma’lumot uchun, Li Kuan Yu Singapur hukumati tepasiga 1959-yilda kelgan bo‘lib, davlatni 1990-yilgacha uzluksiz boshqargan. Aynan uning davrida Singapur qashshoq davlatlar qatoridan chiqib, dunyoning moliyaviy markazlaridan biriga aylangan, aholi turmush darajasi bo‘yicha esa yuqori uchlikdan joy olgan.
Izoh (0)