«Локомотив» ва «Фулад» (Эрон) жамоалари ўртасидаги ОЧЛ 2-тур баҳси олдидан, одатга кўра, матбуот анжумани ўтказилди. Дастлаб унда меҳмонлар бош мураббийи Драган Скочич ва Леонард Месарич иштирок этди, деб хабар беради «Stadion.uz».
Савол: Чемпионлар лигасининг 1-тур ўйинлари бўлиб ўтди. Қайси жамоани гуруҳ фаворити сифатида эътироф эта оласиз?
Скочич: Биринчи ўйиндан кейин гуруҳ босқичидан қайси жамоа чиқишини тахмин қилиш қийин. Жамоалар тенг ўйнади. Гуруҳда яққол фаворит йўқ. Бир нечта тур ўйинларидан кейин аниқроқ фикр билдириш мумкин. «Локомотив» ўтган турдан «Ал-Ҳилол» билан ўйинда ютқазди, аммо ҳисоб ўйинга мос бўлмади. «Локомотив» ўйин бошида консентрацияни йўқотиб қўйди, кейинчалик эса ўйинни назорат қилди.
Леонард Месарич: «Локомотив» стадиони ва майсасини кўрдик, жуда чиройли ва яхши стадион. Ўйлайманки, мураккаб, аммо қизиқарли ўйин бўлади. Жамоамизнинг тайёргарлигини билганим учун эртага ғалаба қозонишига ишонаман.
Савол: «Фулад» жамоаси кетма-кет 3 та ўйинда дуранг ўйнади. Бунинг сабаби нимада?
Жавоб: Бунгача 3 ой давомида биз мағлубият нималигини билмагандик. Сўнгги 3 та ўйиндаги дуранг мен учун ҳеч нарсани англатмайди.
Савол: «Локомотив» сафида тезкор ҳужумчилар бор. «Фулад» ўз дарвозаси дахлсизлигини сақлаб қола оладими?
Жавоб: Рақибга қарама-қарши савол: «Локомотив» ўз дарвозаси дахлсизлигини сақлаб қола оладими? Бизда ҳам тезкор ҳужумчилар бор.
Савол: «Фулад» шу пайтгача учинчи марта ОЧЛда иштирок этади ва шу вақтгача сафарда битта ўйинда ғалаба қозонган. Ўтган йили «Ал-Фатҳ»га қарши сафар ўйинида бир мартагина ғалаба қозонган. Эртага бўладиган сафар ўйинида ғалаба қозонишингизга ишонасизми?
Жавоб: Тарихдаги воқеаларнинг мен учун аҳамияти йўқ. У пайтда бошқа мураббий, бошқа футболчилар бор эди. Тўрт йил олдин «Пахтакор» билан дуранг ўйнагандик, демак, эртага ҳам дуранг бўлади, дегани эмас. Ҳаммасини ўйин кўрсатади.
Савол: Ўтган ҳафтада Эроннинг икки жамоаси Ўзбекистондан мағлубият билан қайтди. Эрон матбуоти уларни таҳлил қилди.
Жавоб: ОАВ ўйинларни таҳлил қилиши нормал ҳолат. Биз эса биринчи турда Эрон жамоалари ўйинини таҳлил қилмадик. Ҳозирча бизга бунинг аҳамияти йўқ.
Савол: «Локомотив»ни ўрганган бўлсангиз, жамоани қандай рақиб сифатида биласиз?
Жавоб: Гуруҳдаги барча рақиблар мураккаб, осон рақиб йўқ. «Локомотив» ҳақида эса аниқ фикр билдира олмайман. Шуни айта оламанки, барча жамоалар финалгача етиб бориш салоҳиятига эга.