Профессионал бокснинг супер оғир вазн тоифаси WBA (Regular) йўналишида жаҳон чемпиони Руслан Чагаев ўзининг навбатдаги ихтиёрий жангини италиялик Франческо Пьянетага қарши ўтказади. Мазкур жанг 25 апрель куни Германияинг Гамбург шаҳрида бўлиб ўтади. Ҳозирда Чагаев мураббийи, яна бир ҳамюртимиз Артур Григорян қўл остида машғулотларни бошлаган. Бу ҳақда «Olamsport.com» хабар бермоқда.
Асли келиб чиқиши италиялик, лекин 6 ёшида оиласи билан Германияга кўчиб ўтган Франческо Пьянета ҳамюртимиз сингари ҳам ҳаваскор, ҳам профессионал боксда ижобий натижаларга эришган. 31 ёшли Пьянета ўзининг профессионал боксдаги 10 йиллик фаолияти давомида жами 33 та жанг ўтказган. Шуларнинг 31 тасида ғалаба қозонган. 2008 йилда WBC таснифида ёшлар ўртасида жаҳон чемпионлиги камарини қўлга киритган.
2013 йилда эса профессионал бокснинг энг оғир вазн тоифасида энг кучли боксчилардан бири – WBA таснифида супер, IBF, WBО ва IBO таснифларида амалдаги жаҳон чемпиони Владимир Кличко билан жанг ўтказган. Аммо техник нокаут билан мағлубиятга учраган.
Эслатиб ўтамиз, икки кун аввал WBA ташкилоти Руслан Чагаевга ўз чемпионлик камарини ҳимоя қилиши учун австралиялик Лукас Браун билан жанг ўтказиш мажбуриятини юклаганди. Чагаев Браундан аввал ихтиёрий равишда Пьянета билан жанг ўтказишни мақсад қилган.