Ислом Каримов Ўзбекистон Республикаси Вазирлар Маҳкамаси аъзоларини тасдиқлади

Ўзбекистон Президенти Ислом Каримов Вазирлар Маҳкамасининг янги таркибини тасдиқлади. Бу ҳақдаги Президент фармони имзоланган куни — 11 февраль, чоршанба куни ЎзА томонидан эълон қилинди, деб ёзади «Кун».

«Ўзбекистон Республикаси Конституциясининг 98-моддасига мувофиқ Вазирлар Маҳкамаси янги сайланган Ўзбекистон Республикаси Олий Мажлиси олдида ваколатларини зиммасидан соқит қилганлиги маълумот учун қабул қилинсин», – дейилади Фармонда.

Аввалроқ, Президент таклифига кўра Ўзбекистон Олий Мажлиси Қонунчилик палатаси ва Сенатининг 23 январдаги қарорларига мувофиқ бош вазир лавозимига Шавкат Мирзиёев тасдиқланган эди.

Қайд этиш жоиз, ҳукумат таркибида катта ўзгаришлар бўлмаган – Сенат раиси этиб сайланган Ниғматилла Йўлдошев ўрнига Музраф Икромов адлия вазири этиб тайинланган бўлса, 4 февраль куни ташкил этилган Ахборот технологиялари ва телекоммуникацияларни ривожлантириш вазирлигига ушбу вазирликка асос бўлган Ўзбекистон Алоқа, ахборотлаштириш ва телекоммуникация технологиялари давлат қўмитаси раиси Хуршид Мирзоҳидов раҳбар сифатида танланган.

Парламент сайловларига қадар бўш қолган Ўзбекистон маданият ва спорт ишлари вазири номи Президент фармонида ҳам кўрсатилмаган (Минҳожиддин Мирзонинг 2014 йил октябридаги истеъфосидан бери вазирликка Баҳодир Аҳмедов раҳбарлик қилмоқда), Давлат геология ва минерал ресурслар қўмитасига «в.б.» (вазифасини бажарувчи) қўшимчаси билан раҳбарлик қилиб келган Илҳомбой Тўрамуротов 11 февралдан тўлақонли раисга айланган.

Ўзбекистон Вазирлар Маҳкамаси янги тасдиқланган таркиби қуйидагича:Шавкат Мирзиёев – бош вазир, қишлоқ ва сув хўжалиги, қишлоқ хўжалиги маҳсулотларини қайта ишлаш ҳамда истеъмол товарлари масалалари комплекси раҳбари;

Рустам Азимов – бош вазирнинг биринчи ўринбосари – молия вазири, макроиқтисодий ривожлантириш, таркибий ўзгартиришлар, хорижий инвестицияларни жалб этиш ва ҳудудларни комплекс ривожлантириш масалалари комплекси раҳбари;

Ботир Зокиров – бош вазир ўринбосари – Давлат архитектура ва қурилиш қўмитаси раиси, коммунал соҳа, транспорт, капитал қурилиш ва қурилиш индустрияси масалалари комплекси раҳбари;

Ғуломжон Иброҳимов – бош вазир ўринбосари, геология, ёқилғи-энергетика комплекси, кимё, нефть-кимё ва металлургия саноати масалалари комплекси раҳбари;

Улуғбек Розуқулов – бош вазир ўринбосари – «Ўзавтосаноат» АК бошқаруви раиси, машинасозлик, автомобильва электротехника саноатини ривожлантириш, маҳсулотларни стандартлаштириш масалалари комплекси раҳбари;

Адҳам Икромов – бош вазир ўринбосари, маданият, таълим, соғлиқни сақлаш ва ижтимоий муҳофаза масалалари комплекси раҳбари;

Элмира Боситхонова – бош вазир ўринбосари – Ўзбекистон хотин-қизлар қўмитаси раиси;

Галина Саидова – иқтисодиёт вазири;

Элёр Ғаниев – ташқи иқтисодий алоқалар, инвестициялар ва савдо вазири;

Азиз Абдуҳакимов – меҳнат ва аҳолини ижтимоий муҳофаза қилиш вазири;

Шуҳрат Тешаев – қишлоқ ва сув хўжалиги вазири;

Хуршид Мирзоҳидов – ахборот технологиялари ва коммуникацияларини ривожлантириш вазири;

Қобул Бердиев – мудофаа вазири;

Адҳам Аҳмедбоев – ички ишлар вазири;

Абдулазиз Комилов – ташқи ишлар вазири;

Музраф Икромов – адлия вазири;

Анвар Алимов – соғлиқни сақлаш вазири;

Алишер Ваҳобов – олий ва ўрта махсус таълим вазири;

Улуғбек Иноятов – халқ таълими вазири;

лавозими бўйича – маданият ва спорт ишлари вазири;

Турсинхон Худайбергенов – фавқулодда вазиятлар вазири;

Ботир Парпиев – Давлат солиқ қўмитаси раиси;

Зоҳид Дусанов – Давлат божхона қўмитаси раиси;

Ботир Тўраев – Давлат статистика қўмитаси раиси;

Даврон Ҳидоятов – Хусусийлаштириш, монополиядан чиқариш ва рақобатни ривожлантириш давлат қўмитаси раиси;

Саидқул Арабов – Ер ресурслари, геодезия, картография ва давлат кадастри давлат қўмитаси раиси;

Илҳомбой Тўрамуротов – Давлат геология ва минерал ресурслар қўмитаси раиси;

Ўзбекистон Конституциянинг 98-моддасига мувофиқ Қорақалпоғистон ҳукуматининг бошлиғи Ўзбекистон Вазирлар Маҳкамаси таркибига лавозими бўйича киради.