Islom Karimov O‘zbekiston Respublikasi Vazirlar Mahkamasi a’zolarini tasdiqladi

O‘zbekiston Prezidenti Islom Karimov Vazirlar Mahkamasining yangi tarkibini tasdiqladi. Bu haqdagi Prezident farmoni imzolangan kuni — 11-fevral, chorshanba kuni O‘zA tomonidan e’lon qilindi, deb yozadi “Kun”.

“O‘zbekiston Respublikasi Konstitutsiyasining 98-moddasiga muvofiq Vazirlar Mahkamasi yangi saylangan O‘zbekiston Respublikasi Oliy Majlisi oldida vakolatlarini zimmasidan soqit qilganligi ma’lumot uchun qabul qilinsin”, – deyiladi Farmonda.

Avvalroq, Prezident taklifiga ko‘ra O‘zbekiston Oliy Majlisi Qonunchilik palatasi va Senatining 23-yanvardagi qarorlariga muvofiq bosh vazir lavozimiga Shavkat Mirziyoyev tasdiqlangan edi.

Qayd etish joiz, hukumat tarkibida katta o‘zgarishlar bo‘lmagan – Senat raisi etib saylangan Nig‘matilla Yo‘ldoshev o‘rniga Muzraf Ikromov adliya vaziri etib tayinlangan bo‘lsa, 4-fevral kuni tashkil etilgan Axborot texnologiyalari va telekommunikatsiyalarni rivojlantirish vazirligiga ushbu vazirlikka asos bo‘lgan O‘zbekiston Aloqa, axborotlashtirish va telekommunikatsiya texnologiyalari davlat qo‘mitasi raisi Xurshid Mirzohidov rahbar sifatida tanlangan.

Parlament saylovlariga qadar bo‘sh qolgan O‘zbekiston madaniyat va sport ishlari vaziri nomi Prezident farmonida ham ko‘rsatilmagan (Minhojiddin Mirzoning 2014-yil oktabridagi iste’fosidan beri vazirlikka Bahodir Ahmedov rahbarlik qilmoqda), Davlat geologiya va mineral resurslar qo‘mitasiga “v.b.” (vazifasini bajaruvchi) qo‘shimchasi bilan rahbarlik qilib kelgan Ilhomboy To‘ramurotov 11-fevraldan to‘laqonli raisga aylangan.

O‘zbekiston Vazirlar Mahkamasi yangi tasdiqlangan tarkibi quyidagicha:Shavkat Mirziyoyev – bosh vazir, qishloq va suv xo‘jaligi, qishloq xo‘jaligi mahsulotlarini qayta ishlash hamda iste’mol tovarlari masalalari kompleksi rahbari;

Rustam Azimov – bosh vazirning birinchi o‘rinbosari – moliya vaziri, makroiqtisodiy rivojlantirish, tarkibiy o‘zgartirishlar, xorijiy investitsiyalarni jalb etish va hududlarni kompleks rivojlantirish masalalari kompleksi rahbari;

Botir Zokirov – bosh vazir o‘rinbosari – Davlat arxitektura va qurilish qo‘mitasi raisi, kommunal soha, transport, kapital qurilish va qurilish industriyasi masalalari kompleksi rahbari;

G‘ulomjon Ibrohimov – bosh vazir o‘rinbosari, geologiya, yoqilg‘i-energetika kompleksi, kimyo, neft-kimyo va metallurgiya sanoati masalalari kompleksi rahbari;

Ulug‘bek Rozuqulov – bosh vazir o‘rinbosari – «O‘zavtosanoat» AK boshqaruvi raisi, mashinasozlik, avtomobilva elektrotexnika sanoatini rivojlantirish, mahsulotlarni standartlashtirish masalalari kompleksi rahbari;

Adham Ikromov – bosh vazir o‘rinbosari, madaniyat, ta’lim, sog‘liqni saqlash va ijtimoiy muhofaza masalalari kompleksi rahbari;

Elmira Bositxonova – bosh vazir o‘rinbosari – O‘zbekiston xotin-qizlar qo‘mitasi raisi;

Galina Saidova – iqtisodiyot vaziri;

Elyor G‘aniyev – tashqi iqtisodiy aloqalar, investitsiyalar va savdo vaziri;

Aziz Abduhakimov – mehnat va aholini ijtimoiy muhofaza qilish vaziri;

Shuhrat Teshayev – qishloq va suv xo‘jaligi vaziri;

Xurshid Mirzohidov – axborot texnologiyalari va kommunikatsiyalarini rivojlantirish vaziri;

Qobul Berdiyev – mudofaa vaziri;

Adham Ahmedboyev – ichki ishlar vaziri;

Abdulaziz Komilov – tashqi ishlar vaziri;

Muzraf Ikromov – adliya vaziri;

Anvar Alimov – sog‘liqni saqlash vaziri;

Alisher Vahobov – oliy va o‘rta maxsus ta’lim vaziri;

Ulug‘bek Inoyatov – xalq ta’limi vaziri;

lavozimi bo‘yicha – madaniyat va sport ishlari vaziri;

Tursinxon Xudaybergenov – favqulodda vaziyatlar vaziri;

Botir Parpiyev – Davlat soliq qo‘mitasi raisi;

Zohid Dusanov – Davlat bojxona qo‘mitasi raisi;

Botir To‘rayev – Davlat statistika qo‘mitasi raisi;

Davron Hidoyatov – Xususiylashtirish, monopoliyadan chiqarishva raqobatni rivojlantirish davlat qo‘mitasi raisi;

Saidqul Arabov – Yer resurslari, geodeziya, kartografiyava davlat kadastri davlat qo‘mitasi raisi;

Ilhomboy To‘ramurotov – Davlat geologiya va mineral resurslar qo‘mitasi raisi;

O‘zbekiston Konstitutsiyaning 98-moddasiga muvofiq Qoraqalpog‘iston hukumatining boshlig‘i O‘zbekiston Vazirlar Mahkamasi tarkibiga lavozimi bo‘yicha kiradi.