Таэквондо (WTF) Паралимпия ўйинлари дастурига киритилди
2020 йил Токио шаҳри (Япония)да ўтказиладиган Паралимпия ўйинлари дастуридан Таэквондо (WTF) спорт тури ҳам ўрин эгаллайди. Бунга Халқаро Паралимпия қўмитасининг бошқарув кенгаши йиғилишида қарор қилинди, деб хабар бермоқда «Olamsport.com».
Шу тариқа, Паралимпия ўйинлари дастуридан 22 спорт тури ўрин эгаллайдиган бўлди. Қайд этилишича, футбол (7х7) ва елканли спорт турлари дастурдан олиб ташланган.
Елканли спорт тури дастурга 2000 йил Сидней шаҳри (Австралия)да бўлиб ўтган Паралимпия ўйинларида киритилган. Футбол (7х7) бўйича мусобақалар эса 1984 йилдан буён Паралимпия ўйинлари дастуридан ўрин эгаллаб келган.
Эслатиб ўтамиз, Абу-Даби шаҳрида ўтказилган Халқаро Паралимпия қўмитасининг бошқарув кенгаши йиғилишида бироз аввал бадминтон спорт тури ҳам Паралимпия ўйинлари дастурига киритилгани маълум қилинган эди. Бундан ташқари, дастурга байдарка ва каноэ ҳамда триатлон спорт турлари ҳам киритилди. Ушбу спорт турлари бўйича Паралимпия ўйинларининг илк совриндорлари 2016 йил Рио-де-Жанейро шаҳри (Бразилия)да ўтказиладиган мусобақаларда аниқланади.
