«Яндекс» интернет йўқолишига ҳозирлигини маълум қилди

«Яндекс» «интернетдан кейинги» давр келишига тайёргарлик кўрмоқда, дея хабар берди «Российская газета» компания вакилига таяниб.

«Келажак интернети — бу веб эмас, бир-бири билан алоқа қилиб, нафақат компьютер, планшет ва телефонларни, балки телевизор, автомобиль, ақлли билагузук, уй техникаси ва бошқаларни боғлайдиган дастур интерфейсларидир. Биз буни англаб бўлганмиз ва шундай истиқболларни ҳисобга олган ҳолда яшамоқдамиз», — деди сервислар маркетинги бўйича директор Андрей Себрант.

Мисол сифатида у «Яндекс.Такси» сервисини келтириб ўтди. У серверларда миллионлаб саҳифаларни ўқиб ўтирмайди, шунчаки машиналардаги мобил қурилмаларга мурожаат қилади. Таксопаркларга ҳам сайт керак эмас, бунинг ўрнига қурилмалар ўртасида ўзаро маълумотлар алмашинуви содир бўлади.

Эслатиб ўтамиз, аввалроқ Google компанияси раҳбари Эрик Шмидт Швейцариянинг Давос шаҳрида бўлиб ўтган Жаҳон иқтисодий форумидаги баҳс-мунозаралардан бирида интернетнинг саноқли кунлари қолганини айтган эди.

«Интернет йўқолиб кетади. IP-манзиллар ҳамда сиз алоқа қиладиган қурилмалар, датчиклар ва бошқа буюмлар шунчалик кўпайиб кетадики, буни пайқамай ҳам қўясиз», — деган эди у.