«Туркистон» саройида 29 декабрь куни «Президент арчаси» тантаналари бошланди. Бу ҳақда Ўзбекистон Миллий ахборот агентлиги хабар бермоқда.
Мамлакатимизнинг барча болалари орзиқиб кутувчи ушбу шодиёналарга Тошкент шаҳридаги Меҳрибонлик уйлари тарбияланувчилари, кам таъминланган, серфарзанд оилаларнинг ўғил-қизлари таклиф этилди.
«Туркистон» саройининг камалакранг чироқлар, ёрқин шарлар билан безатилган фойесида чорлов мусиқаси садолари янграйди. Ушбу байрамни кўтаринки руҳда, юксак савияда ўтказишда Ўзбекистон Республикаси Халқ таълими вазирлиги, «Сен ёлғиз эмассан» республика жамоатчилик болалар жамғармаси томонидан қизғин тайёргарлик кўрилди.
Арча атрофига жам бўлган болаларга турли эртак ва мультфильмлар қаҳрамонлари ҳамроҳ бўлиб, биргаликда Қорбобо ва Қорқизни даврага чорлайди. Қорбобо-ю Қорқиз, айиқча-ю тулкича, Зумрад ва Қиммат, Насриддин Афанди каби севимли қаҳрамонлар билан байрам янада завққа тўлади.
Мамлакатимизда соғлом ва баркамол авлодга кўрсатилаётган чексиз меҳр-эътибор, ёруғ ва саодатли, тинч-осойишта кунларимиз, мусаффо осмонимиз, истиқлолнинг азиз неъматлари, бахтиёр болаликнинг беғубор онлари, нуроний отахон ва онажонларни улуғловчи куй-қўшиқлар янграйди. Эстрада ижрочилари ва цирк усталари иштирокидаги мусиқий дастур, ранг-баранг рақслар, болаларнинг зеҳнини чархловчи турли ўйинлар, тез айтишлару топишмоқлар байрамга янада жўшқинлик бағишлайди. Топқир, зеҳнли ва зийрак ўғил-қизларга Қорбобо ўйинчоқлар, китоблар, ширинликлар совға қилади.
– «Президент арчаси» тантаналарини мен ҳам орзиқиб кутдим, – дейди Юнусобод туманидаги 23-Меҳрибонлик уйи тарбияланувчиси 11 ёшли Гўзал Насриддинова. – Ушбу байрамга бағишлаб янги шеърлар ёд олдим, қўшиқлар ўргандим. Арча атрофида мазза қилиб рақсга тушдик. Қувноқ томошалардан баҳраманд бўлдик. Бундай завқли байрам учун Президентимиздан жуда миннатдормиз.
Арча атрофидаги томошалардан сўнг болалар залга таклиф этилди. Улар учун «Томоша» болалар студияси томонидан тайёрланган «Мўъжизалар китоби» театрлаштирилган дастури намойиш этилди.
Болаларга Президентимизнинг Янги йил совғалари топширилди. Бундай тадбирлар Қорақалпоғистон Республикаси ва барча вилоятларда бўлиб ўтмоқда.
Изоҳ (0)