“Turkiston” saroyida 29-dekabr kuni “Prezident archasi” tantanalari boshlandi. Bu haqda O‘zbekiston Milliy axborot agentligi xabar bermoqda.
Mamlakatimizning barcha bolalari orziqib kutuvchi ushbu shodiyonalarga Toshkent shahridagi Mehribonlik uylari tarbiyalanuvchilari, kam ta’minlangan, serfarzand oilalarning o‘g‘il-qizlari taklif etildi.
“Turkiston” saroyining kamalakrang chiroqlar, yorqin sharlar bilan bezatilgan foyyesida chorlov musiqasi sadolari yangraydi. Ushbu bayramni ko‘tarinki ruhda, yuksak saviyada o‘tkazishda O‘zbekiston Respublikasi Xalq ta’limi vazirligi, “Sen yolg‘iz emassan” respublika jamoatchilik bolalar jamg‘armasi tomonidan qizg‘in tayyorgarlik ko‘rildi.
Archa atrofiga jam bo‘lgan bolalarga turli ertak va multfilmlar qahramonlari hamroh bo‘lib, birgalikda Qorbobo va Qorqizni davraga chorlaydi. Qorbobo-yu Qorqiz, ayiqcha-yu tulkicha, Zumrad va Qimmat, Nasriddin Afandi kabi sevimli qahramonlar bilan bayram yanada zavqqa to‘ladi.
Mamlakatimizda sog‘lom va barkamol avlodga ko‘rsatilayotgan cheksiz mehr-e’tibor, yorug‘ va saodatli, tinch-osoyishta kunlarimiz, musaffo osmonimiz, istiqlolning aziz ne’matlari, baxtiyor bolalikning beg‘ubor onlari, nuroniy otaxon va onajonlarni ulug‘lovchi kuy-qo‘shiqlar yangraydi. Estrada ijrochilari va sirk ustalari ishtirokidagi musiqiy dastur, rang-barang raqslar, bolalarning zehnini charxlovchi turli o‘yinlar, tez aytishlaru topishmoqlar bayramga yanada jo‘shqinlik bag‘ishlaydi. Topqir, zehnli va ziyrak o‘g‘il-qizlarga Qorbobo o‘yinchoqlar, kitoblar, shirinliklar sovg‘a qiladi.
– “Prezident archasi” tantanalarini men ham orziqib kutdim, – deydi Yunusobod tumanidagi 23-Mehribonlik uyi tarbiyalanuvchisi 11 yoshli Go‘zal Nasriddinova. – Ushbu bayramga bag‘ishlab yangi she’rlar yod oldim, qo‘shiqlar o‘rgandim. Archa atrofida mazza qilib raqsga tushdik. Quvnoq tomoshalardan bahramand bo‘ldik. Bunday zavqli bayram uchun Prezidentimizdan juda minnatdormiz.
Archa atrofidagi tomoshalardan so‘ng bolalar zalga taklif etildi. Ular uchun “Tomosha” bolalar studiyasi tomonidan tayyorlangan “Mo‘jizalar kitobi” teatrlashtirilgan dasturi namoyish etildi.
Bolalarga Prezidentimizning Yangi yil sovg‘alari topshirildi. Bunday tadbirlar Qoraqalpog‘iston Respublikasi va barcha viloyatlarda bo‘lib o‘tmoqda.
Izoh (0)