Ўзбекистон давлат санъат музейи реконструкция қилинади

Ўзбекистон давлат санъати музейи ташқи қисми миллий руҳда, замонавий архитектура дизайнига мос равишда реконструкция қилинади, экспозиция заллари эса мукаммал таъмирланади, деб хабар бермоқда «Kun.uz».

Бу Ўзбекистон бош вазири Шавкат Мирзиёев томонидан 23 декабрь куни имзоланган «Ўзбекистон давлат санъат музейи биносини реконструкция қилиш ва унинг моддий-техника базасини мустаҳкамлаш тўғрисида»ги қарорида белгилаб қўйилган.

Вазирлар Маҳкамасининг қарорига асосан, «белгиланган тартибда экспертизадан ўтказилган лойиҳа-смета ҳужжатлари асосида» иншоотни реконструкция қилши ва унинг моддий-техника базасини мустаҳкамлаш ишлари Ўзбекистоннинг 2016 йилги ва келгуси йиллардаги Инвестиция дастурига киритилади.

Тошкент шаҳар ҳокимлигига «Давархитектқурилиш» қўмитаси ва буюртмачи («Ягона буюртмачи хизмати» инжиниринг компанияси) биргаликда музейнинг ташқи қисми ва тегишли ҳудудини реконструкция қилиш, ички қисмини мукаммал таъмирлаш, бинода зарур мўътадил об-ҳавони таъминловчи ускуналар билан жиҳозлаш ва сайёҳлар учун зарур шарт-шароитлар яратиш, намунали сервис хизматини кўрсатиш (ҳунармандлар шаҳарчаси, арт-кафе, совғалар дўконлари қуриш) учун мўлжалланган лойиҳа-смета ҳужжатларини тайёрлаш юклатилган.

Қарорда қайд этилишича, Маданият ва спорт ишлари вазирлиги музейдаги мавжуд моддий ва маънавий жиҳатдан эскирган, иқтисодий самарасиз ва фойдаланишга яроқсиз бўлган ускуналарни белгиланган тартибда ҳисобдан чиқариш ишларини амалга оширади.

Бундан ташқари, музей маъмурияти «Ўзбектуризм» компанияси билан ҳамкорликда муассасага хорижий сайёҳларни кенг жалб этиш чора-тадбирларини амалга оширади, шунингдек, Маданият ва спорт ишлари вазирлиги Санъат музейида ўқувчи ва талабалар учун мунтазам равишда турли мавзулардаги давра суҳбатлари, учрашувлар, маънавий тадбирлар ва очиқ дарслар ўтказилишини таъминлайди.

Тошкентдаги Санъат музейига 1918 йилда асос солинган. Музей тўрт бўлимдан иборат бўлиб, унда Ўзбекистон халқ-амалий безаш санъати, Ўзбекистон тасвирий санъати, Шарқ мамлакатлари санъати ҳамда Россия ва Ғарбий Европа санъати билан танишиш мумкин.