O‘zbekiston davlat san’at muzeyi rekonstruksiya qilinadi

O‘zbekiston davlat san’ati muzeyi tashqi qismi milliy ruhda, zamonaviy arxitektura dizayniga mos ravishda rekonstruksiya qilinadi, ekspozitsiya zallari esa mukammal ta’mirlanadi, deb xabar bermoqda “Kun.uz”.

Bu O‘zbekiston bosh vaziri Shavkat Mirziyoyev tomonidan 23-dekabr kuni imzolangan “O‘zbekiston davlat san’at muzeyi binosini rekonstruksiya qilish va uning moddiy-texnika bazasini mustahkamlash to‘g‘risida”gi qarorida belgilab qo‘yilgan.

Vazirlar Mahkamasining qaroriga asosan, “belgilangan tartibda ekspertizadan o‘tkazilgan loyiha-smeta hujjatlari asosida” inshootni rekonstruksiya qilshi va uning moddiy-texnika bazasini mustahkamlash ishlari O‘zbekistonning 2016-yilgi va kelgusi yillardagi Investitsiya dasturiga kiritiladi.

Toshkent shahar hokimligiga “Davarxitektqurilish” qo‘mitasi va buyurtmachi (“Yagona buyurtmachi xizmati” injiniring kompaniyasi) birgalikda muzeyning tashqi qismi va tegishli hududini rekonstruksiya qilish, ichki qismini mukammal ta’mirlash, binoda zarur mo‘tadil ob-havoni ta’minlovchi uskunalar bilan jihozlash va sayyohlar uchun zarur shart-sharoitlar yaratish, namunali servis xizmatini ko‘rsatish (hunarmandlar shaharchasi, art-kafe, sovg‘alar do‘konlari qurish) uchun mo‘ljallangan loyiha-smeta hujjatlarini tayyorlash yuklatilgan.

Qarorda qayd etilishicha, Madaniyat va sport ishlari vazirligi muzeydagi mavjud moddiy va ma’naviy jihatdan eskirgan, iqtisodiy samarasiz va foydalanishga yaroqsiz bo‘lgan uskunalarni belgilangan tartibda hisobdan chiqarish ishlarini amalga oshiradi.

Bundan tashqari, muzey ma’muriyati “O‘zbekturizm” kompaniyasi bilan hamkorlikda muassasaga xorijiy sayyohlarni keng jalb etish chora-tadbirlarini amalga oshiradi, shuningdek, Madaniyat va sport ishlari vazirligi San’at muzeyida o‘quvchi va talabalar uchun muntazam ravishda turli mavzulardagi davra suhbatlari, uchrashuvlar, ma’naviy tadbirlar va ochiq darslar o‘tkazilishini ta’minlaydi.

Toshkentdagi San’at muzeyiga 1918-yilda asos solingan. Muzey to‘rt bo‘limdan iborat bo‘lib, unda O‘zbekiston xalq-amaliy bezash san’ati, O‘zbekiston tasviriy san’ati, Sharq mamlakatlari san’ati hamda Rossiya va G‘arbiy Yevropa san’ati bilan tanishish mumkin.