Жорий йилнинг ёзида жонли куйланган, видеоси ҳаваскорлик даражасида суратга олинган «Айрилдик-ку бизлар» қўшиғи билан Узнетда машҳур бўлиб кетган Умиджон Шерматов янги альбом тайёрламоқда. Бу ҳақда Facebook’даги Funny Anonymous саҳифаси хабар берди.
Саҳифада «Умиджон Шерматов: Янги йилда мухлисларимга совға қилиб янги альбомимни тақдим этаман» сарлавҳаси остида ижод жараёни акс этган учта фотосурат ҳам келтирилган.
Эслатиб ўтамиз, Умиджон Шерматов «Айрилдик-ку бизлар» номли қўшиқ куйлагани ҳақида интернет-нашрлар орасида биринчи бўлиб iLike.Uz сайти хабар берганди. «Овоз муҳаррири ва яхши телефон ёрдамида интернет юлдузига айланишнинг ёрқин мисоли», – деб таъриф берганди ўшанда Умиджон Шерматовнинг биринчи «клипи»га.
Интернет ҳамжамияти қўшиқдаги сўзлар орасида нақоратидаги алоҳида урғу бериб айтиладиган «Нега» жумласига айниқса катта эътибор қаратган, ушбу сўз ва умуман қўшиқ муаллифи интернетдаги кўплаб мемларнинг қаҳрамонига айланган эди.
Изоҳ (0)