Ким Чен Инга суиқасд уюштирилиши ҳақидаги фильмни бир кеча-кундузда 900 минг фойдаланувчи юклаб олди

Ким Чен Ин ўлими ҳақидаги «Интервью» фильмининг ноқонуний нусхаларини 900 мингдан ортиқ киши юклаб олди, дея хабар бермоқда «Сегодня.ua».

Фильм YouTube Movies, Google Play, Xbox Video ва кинолентанинг  расмий сайтига жойлангач, бутун дунё бўйлаб торрентлар фойдаланувчилари унинг юқори сифатли нусхаларини ноқонуний равишда юклашди. Уларнинг 28 фоизи АҚШ ҳиссасига тўғри келади.

Эслатиб ўтамиз, «Интервью» деб номланган ушбу фильм сюжетида АҚШ телевидениесида ишлайдиган икки мухбир Ким Чен Индан интервью олиш имконига эга бўлади. Улар Шимолий Кореяга кетиш сафаридан аввал махфий хизмат томонидан КХДР раҳбарини ўлдириш ҳақида буйруқ олади. Фильмдаги бош ролларда Жеймс Франко («Ўргимчак одам») ва Сет Роген иштирок этган.

«Интервью» 25 декабрь, Рождество кунидан АҚШ ҳудудидаги 200 дан ортиқ мустақил кинотеатрларда намойиш этила бошлади. Бундай қарорни кинолентани ишлаб чиқарган Sony Pictures компанияси қабул қилди.

Дастлаб фильмни АҚШдаги 3 мингта кинотеатрда кўрсатиш режалаштирилган эди. Sony Pictures компанияси компьютер тармоғига ҳужум уюштирган хакерлар «Интервью» премьераси  бўладиган кинотеатрларда 2001 йил 11 сентябрдаги каби терактлар уюштириш билан таҳдид этгач, фильмнинг 25 декабрга мўлжалланган АҚШ премьераси бекор қилинган эди.