Жанубий Африка Республикаси президенти Жейкоб Зума сўнгги бор уйланишга қарор қилди. Бу ҳақда ТАСС агентлигидаги ахборотга таяниб, «Kun.uz» хабар бермоқда.
Жейкоб Зума ЖАРдаги зулус қабиласига мансуб бўлиб, ушбу қабила урф-одатларига кўра, ҳар бир эркак умрининг охирида яна бир марта уйланиш ҳуқуқига эга ва бу аёл унинг кексалик даврига ранг олиб кириши керак.
«Менинг хотинларим бор, лекин мен энг сўнггисига уйланишим керак», — деди Зума. У бу сўзларни ўзи туғилиб ўсган Квазулу-Наталь вилоятига ташриф буюрганида айтди, кекса қабиладошлари унинг бу сўзларини олқишлар билан кутиб олди.
Квазулу-Наталь университети профессори Сиҳаву Нгубаненинг сўзларига кўра, полигам никоҳ тарафдори бўлган зулуслар одатига кўра, эркак ўз ҳаётининг сўнгги босқичида охирги марта уйланади, аксарият ҳолатларда, бирор хотинининг сингилларидан бири билан турмуш қуради.
«Қария эркак ҳақида қайғуриш ғами, одатда, айнан шу энг кичик хотин бўйнида бўлади. У қолган кундошларига нисбатан ёшроқ ва фавқулодда вазиятлар учун эпчилроқ бўлади», — деди профессор.
Зума кўпхотинлик тарафдори эканини очиқ айтган ЖАРнинг илк президенти ҳисобланади. Ҳозиргача у олти марта уйланган бўлиб, сўнгги никоҳи 2012 йил қайд этилган. Ҳозирги вақтда унинг олти хотини ва 20 нафар фарзанди бор.
Аввалроқ, Зуманинг турмуш ўртоқларидан бири — Кейт Манцҳо-Зума 2000 йил вафот этгани хабар қилинган эди. Президентнинг бошқа бир хотини — Нкосазане Дламини-Зума эса ажрашганидан сўнг кетма-кет ЖАР Ташқи ва Ички ишлар вазирликларига раҳбарлик қилди, ҳозирги вақтда Африка Иттифоқи комиссияси раиси ҳисобланади.
Изоҳ (0)