Janubiy Afrika Respublikasi prezidenti Jeykob Zuma so‘nggi bor uylanishga qaror qildi. Bu haqda “TASS” agentligidagi axborotga tayanib, “Kun.uz” xabar bermoqda.
Jeykob Zuma JARdagi zulus qabilasiga mansub bo‘lib, ushbu qabila urf-odatlariga ko‘ra, har bir erkak umrining oxirida yana bir marta uylanish huquqiga ega va bu ayol uning keksalik davriga rang olib kirishi kerak.
“Mening xotinlarim bor, lekin men eng so‘nggisiga uylanishim kerak”, — dedi Zuma. U bu so‘zlarni o‘zi tug‘ilib o‘sgan Kvazulu-Natal viloyatiga tashrif buyurganida aytdi, keksa qabiladoshlari uning bu so‘zlarini olqishlar bilan kutib oldi.
Kvazulu-Natal universiteti professori Sihavu Ngubanening so‘zlariga ko‘ra, poligam nikoh tarafdori bo‘lgan zuluslar odatiga ko‘ra, erkak o‘z hayotining so‘nggi bosqichida oxirgi marta uylanadi, aksariyat holatlarda, biror xotinining singillaridan biri bilan turmush quradi.
“Qariya erkak haqida qayg‘urish g‘ami, odatda, aynan shu eng kichik xotin bo‘ynida bo‘ladi. U qolgan kundoshlariga nisbatan yoshroq va favqulodda vaziyatlar uchun epchilroq bo‘ladi”, — dedi professor.
Zuma ko‘pxotinlik tarafdori ekanini ochiq aytgan JARning ilk prezidenti hisoblanadi. Hozirgacha u olti marta uylangan bo‘lib, so‘nggi nikohi 2012-yil qayd etilgan. Hozirgi vaqtda uning olti xotini va 20 nafar farzandi bor.
Avvalroq, Zumaning turmush o‘rtoqlaridan biri — Keyt Mantsho-Zuma 2000-yil vafot etgani xabar qilingan edi. Prezidentning boshqa bir xotini — Nkosazane Dlamini-Zuma esa ajrashganidan so‘ng ketma-ket JAR Tashqi va Ichki ishlar vazirliklariga rahbarlik qildi, hozirgi vaqtda Afrika Ittifoqi komissiyasi raisi hisoblanadi.
Izoh (0)