Байрам арафасида бу йил кўпчилик болалар боғчаларида янги йил байрами ўтказилмаслиги ҳақида миш-мишлар тарқала бошлаган эди. Ўзбекистон Халқ таълими вазирлиги матбуот котиби Баҳриддин Шайвалиев мактабгача таълим муассасаларида (МТМ) янги йил тадбирларини ўтказишни тақиқлаш тўғрисида вазирликда ҳеч қандай топшириқ бўлмаганини маълум қилди, деб хабар бермоқда «Podrobno.uz».
«Podrobno.uz» аниқлик киритишича, 2009 йил 14 майда Адлия вазирлиги томонидан тасдиқланган «Мактабгача таълим муассаларида болалар ҳимояси ва саломатлиги тўғрисидаги» низомга биноан, МТМларда янги йил тадбирларини ўтказиш учун дастлаб туман ёнғин хавфсизлик хизматидан тадбир ўтказиладиган жойнинг ёнғин хавфсизлиги қоидаларига мослиги ҳақида рухсат олиш лозим.
Бундан ташқари ота-оналар қўмитаси йиғилишини ўтказиб, уларнинг розилиги билангина байрам тадбирини ташкиллаштириш мумкин. Ота-оналардан пул йиғиш тақиқланган бўлиб, фақат кўнгилли равишда тадбирни ташкиллаштириш мумкин. Маблағ арча, қорбобо ёки қорқизни таклиф қилишга сарфланиши мумкин. Айнан кимни таклиф қилишни ота-оналар қўмитаси ҳал қилади. Энг асосийси, янги йил байрами шунчаки совғаларни тарқатиш ва зиёфатгина эмас, балки турли викторина ва танловларга бой тарбиявий-маърифий тадбир сифатида ўтказилиши тавсия қилинган.
«Podrobno.uz» суҳбатдошининг маълум қилишича, сўнгги вақтларда унга болалар боғчаларидаги янги йил байрами учун 50 минг сўмдан пул йиғилиши таклиф қилинганидан нолиган ота-оналар арз қилган ва бу ҳолатга барҳам беришни сўраган. Бундай вазиятлар ота-оналар қўмитасида содир бўлгани учун ушбу МТМларга ҳар бир ота-она ўз имкониятидан келиб чиқиб совға олиши белгиланган тадбирлар ташкиллаштириш тавсия қилинган.
Изоҳ (0)